وزیراعلیٰ سندھ سے ایڈیشنل آئی جی کی ملاقات، ضمنی انتخابات میں فائرنگ کی تفصیلات طلب

وزیراعلیٰ سندھ سید مراد علی شاہ سے ایڈیشنل آئی جی کراچی جاوید اوڈھو نے ملاقات کی، جس کے دوران شہر میں امن و امان کی صورتحال کا جائزہ لیا گیا۔

وزیراعلیٰ نے کورنگی میں ضمنی انتخابات کے دوران فائرنگ کے واقعے اور اس میں جاں بحق ہونے والے شخص کے بارے میں معلومات لیں۔

مراد علی شاہ نے ایڈیشنل آئی جی کو واقعے کی شفاف انکوائری کرکے ملوث ملزمان کے خلاف سخت کارروائی کرنے کی ہدایت دی۔

انہوں نے کہا کہ آئندہ ماہ شہر میں بلدیاتی انتخابات ہونے ہیں، امن و امان مزید بہتر کیا جائے۔

وزیراعلیٰ سندھ کا کہنا تھا کہ شرپسند و قانون شکن عناصر کے خلاف سخت کارروائی جاری رکھی جائے۔

انہوں نے کہا کہ ہم کسی صورت شہر کے امن کو خراب کرنے کی اجازت نہیں دیں گے۔

مراد علی شاہ کا کہنا تھا کہ شہر قائد اور صوبے میں جس کو سیاست کرنی ہے پُرامن سیاست کرے۔

انہوں نے کہا کہ ہم نے بڑی قربانیوں کے بعد اس شہر کا امن بحال کیا ہے، جسے کسی صورت خراب ہونے نہیں دیں گے۔

وزیراعلیٰ سندھ نے مزید کہا کہ تمام ایس ایس پیز اپنے اضلاع میں کڑی نگرانی رکھنے کے لیے پیٹرولنگ اور انٹیلی جنس کے کام کو بہتر کریں۔

بشکریہ جنگ