ورلڈ کپ ٹرافی کون اٹھائے گا؟ آسٹریلیا اور بھارت کل آمنے سامنے

انٹرنیشنل کرکٹ کونسل (آئی سی سی) کرکٹ ورلڈ کپ 2023 کے فائنل میں کل آسٹریلیا اور بھارت آمنے سامنے ہوں گے۔ فائنل پاکستانی وقت کے مطابق دوپہر ڈیڑھ بجے نریندر مودی اسٹیڈیم میں کھیلا جائے گا۔

دنیا کی دو بہترین ٹیمیں ورلڈ کپ فائنل میں مد مقابل ہوں گی، جہاں ایک جانب بھارت جو ایونٹ میں ناقابل شکست رہا ہے تو دوسری طرف پانچ مرتبہ کی چیمپئن آسٹریلیا ہے جس نے ابتدائی دو شکستوں کے بعد مسلسل آٹھ فتوحات حاصل کیں۔

میزبان بھارت کی فاسٹ بولنگ نے پورے ورلڈ کپ میں اچھا پرفارم کیا، خاص طور پر محمد شامی نے اپنی سوئنگ گیندوں سے ہر بیٹر کو گھماکر رکھ دیا۔ 

بھارت اور آسٹریلیا کے درمیان ورلڈ کپ فائنل میچ کے لیے پِچ کی تیاری حتمی مرحلے میں داخل ہوگئی۔

جسپریت بمرا اور محمد سراج کے علاوہ دونوں اسپنرز بھی کیریئر کی بہترین فارم میں ہیں لیکن آسٹریلوی اوپنر ٹریوس ہیڈ اور ڈیوڈ وارنر پہلی گیند سے حملہ کرتے ہیں پھر مچل مارش، اسٹیو اسمتھ اور گلین میکسویل بھی بھارتی بولنگ پر حملہ آور ہونے کے لیے تیار ہیں۔

آسٹریلوی بولرز کے لیے روہیت شرما، ویرات کوہلی، شبمن گل اور کے ایل راہول بڑا چیلنج ہوں گے لیکن احمدآباد پر ٹاس بہت اہم ہوگا۔

بھارت آئی سی سی ورلڈ کپ کے ناک آؤٹ مرحلے میں کبھی آسٹریلیا کو شکست نہیں دے سکا ہے، لیکن اس بار اسے ہوم گراؤنڈ کا ایڈوانٹیج حاصل ہے۔

ورلڈ کپ ٹرافی کے حصول کیلئے اس فائنل معرکے کو ایک لاکھ سے زائد شائقین دیکھیں گے۔

بشکریہ جنگ