مِفتاح اسماعیل نے مخالفین سے تکرار کی وائرل ویڈیو کی وضاحت کردی

پاکستان مسلم لیگ ن کے رہنما اور کراچی میں قومی اسمبلی کے حلقہ این اے 249 کے ضمنی انتخاب میں امیدوار مِفتاح اسماعیل نے مخالفین سے تکرار اور تلخ کلامی کی وائرل ویڈیو کی وضاحت کردی۔

مفتاح اسماعیل کا کہنا ہےکہ یہ ویڈیو ایک ماہ پرانی ہے، وہ ایک مارکیٹ میں گئے تھے جو کسی اور سیاسی پارٹی کے ورکر چلارہے تھے، وہ نواز شریف کو چور کہہ رہے تھے۔

کراچی کے حلقے این اے 249 کے ضمنی انتخابات میں مسلم لیگ نون کے امیدوار مفتاح اسماعیل کی مارکیٹ میں مخالفین سے تکرار، نوک جھونک اور تلخ کلامی کی ویڈیو وائرل ہوگئی، مفتاح نے وضاحتی بیان میں کہا کہ مجھے گالی نہیں دینا چاہئے تھی، یہ میری غلطی تھی۔

ن لیگی رہنما کے مطابق میں نےکہا کہ نواز شریف کو چور نہ کہیں، دوسری بار بھی انہوں نے نواز شریف کو چور کہا تو میں نے کہا وہ خود چور ہیں۔

انہوں نے کہا کہ بہرحال مجھےگالی نہیں دینا چاہیے تھی، یہ میری غلطی تھی۔

واضح رہے کہ این اے 249 پر ہونے والے ضمنی انتخاب میں اے این پی نے آج مسلم لیگ کے رہنما و امیدوار مفتاح اسماعیل کی حمایت کا اعلان کیا ہے۔

اے این پی نے این اے 249 سے اورنگزیب بونیری کو کھڑا کیا تھا، تاہم مفتاح اسماعیل کے حق میں عوامی نیشنل پارٹی نے اپنے امیدوار کو دستبردار کرا دیا۔

مفتاح اسماعیل کے حق میں دستبردار ہونے والے حاجی اورنگزیب خان بونیری نے کہا کہ پارٹی فیصلوں کے پابند ہیں، امید ہے مسلم لیگ نون ضمنی انتخاب میں کامیاب ہو گی۔

بشکریہ جنگ