ملک میں نظام کی تبدیلی کی نہیں، آئین پر عمل کی ضرورت ہے، رانا ثناء اللّٰہ

مسلم لیگ نون کے رہنما رانا ثناء اللّٰہ نے کہا ہے کہ ملک میں نظام کی تبدیلی کی ضرورت نہیں، آئین پر عمل کرنے کی ضرورت ہے۔

رانا ثناء اللّٰہ منشیات اسمگلنگ کیس کی سماعت کے لیے عدالت میں پیش ہوئے، جہاں محکمہ پراسیکیوشن نے کہا کہ کیس کے پراسیکیوٹر نہیں آ رہے، جس پر رانا ثناء اللّٰہ کے وکیل فرہاد شاہ نے کہا کہ کیس کی سماعت کے لیے مارچ کی تاریخ دے دیں، عدالت نے کیس کی سماعت 19 فروری تک ملتوی کردی۔

اس موقع پر میڈیا سے بات کرتے ہوئے انہوں نے کہا کہ اگر متفقہ آئین سے ہٹے تو اتفاق رائے پیدا کرنا نا ممکن ہو گا اور ملک نئے بحران سے دوچار ہو جائے گا۔

انہوں نے کہا کہ قوانین میں ترامیم لائی جارہی ہیں، ایسے قانون لائے جارہے ہیں کہ ججز سے پوچھا جائے گا کہ ٹرائل میں تاخیر کیوں ہوئی۔

ان کا کہنا ہے کہ فروغ نسیم بڑے پرانے ایجنٹ ہیں، سیاسی مخالفین کےخلاف جھوٹے مقدمات بنائے جارہے ہیں، ساڑھے تین سال سے حکومت صرف انتقام لے رہی ہے۔

رانا ثنا اللہ نے زور دیا کہ یہ ہمارا یقین اور عزم ہے کہ اس ملک کو فیئر اینڈ فری الیکشن چاہیے۔

رانا ثناء اللّٰہ کا مزید کہنا تھا کہ لاہور دھماکے کے وقت وزیر اعظم اپنے گالم گلوچ بریگیڈ کیساتھ بیٹھے تھے، حکومت کو کسی چیز کا دھیان نہیں۔

مسلم لیگ نون کے رہنما کا یہ بھی کہنا تھا کہ کورونا بحران میں ملنے والی غیر ملکی امداد کو سوشل میڈیا کی ٹیم میں تقسیم کر دیا گیا، انہوں نے عوام کو لوٹا ہے، ان شاء اللّٰہ ان کے حساب کا وقت آ گیا ہے۔

بشکریہ جنگ