محمد رضوان رشتہ دار نہیں، ان جیسا بننا چاہتا ہوں، حسیب خان

قومی ٹیم کے وکٹ کیپر بیٹر محمد رضوان سے مشابہت رکھنے والے پاکستان جونیئر لیگ کے کھلاڑی حسیب خان نے کہا ہے کہ رضوان میرے کچھ نہیں لگتے وہ بس میرے پسندیدہ کھلاڑی ہیں، ان کی طرح بننا ہے اور ان ہی کی طرح بیٹنگ کرنی ہے۔

 پاکستان جونیئر لیگ کی ٹیم مردان واریئرز کے بیٹنگ آل راؤنڈر حسیب خان سب کی توجہ کا مرکز ہیں جس کی وجہ ان کی کارکردگی اور محمد رضوان سے مشابہت ہے۔

حسیب خان نے جیو نیوز سے گفتگو کرتے ہوئے کہا کہ محمد رضوان کی بیٹنگ کو دیکھ کر بہت مزہ آتا ہے، ان کی اننگز کو مس نہیں کرتا۔

انہوں نے کہا کہ محمد رضوان کی بیٹنگ سے بہت کچھ سیکھتا ہوں،  مجھے ان کی طرح اننگز کھیلنی ہیں جو پاکستان کے کام آئیں۔

حسیب خان نے کہا کہ ٹیم مینٹور شاہد خان آفریدی کا ساتھ بہت کام آ رہا ہے، وہ مجھے بولنگ کے بارے میں بہت بتاتے ہیں جو میرے کام آرہا ہے۔

واضح رہے کہ حسیب خان کا تعلق پشاور سے ہے۔ محمد رضوان سے ان کی شکل ملتی ہے اور وہ شاٹس بھی انہی کی طرح کھیلنے کی کوشش کرتے ہیں جس کے باعث لوگ انہیں محمد رضوان کا رشتہ دار سمجھتے ہیں۔

بشکریہ جنگ