لینڈنگ اور ٹیک آف کے دوران پائلٹس خود احتیاط کریں، سول ایوی ایشن

لاہور ایئرپورٹ پر جہازوں سے پرندوں کے ٹکرانے کے واقعات میں اضافے پر سول ایوی ایشن اتھارٹی (سی اے اے) نے ایئرلائنز کو ہدایت کی ہے کہ لینڈنگ اور ٹیک آف کے دوران پائلٹس خود ہی احتیاط کریں۔

علامہ اقبال انٹرنیشنل ایئرپورٹ پر پچھلے چند دنوں میں جہازوں سے پرندوں کے ٹکرانے کے واقعات میں اضافہ ہوا ہے جس پر سول ایوی ایشن نے ایئر لائنز کے لیے نوٹم جاری کردیا ہے۔

نوٹم کے مطابق مون سون کے باعث ایئرپورٹ کی حدود میں پرندوں کی تعداد میں اضافہ ہوگیا ہے۔ علامہ اقبال انٹرنیشنل ایئرپورٹ کے رن وے اور اطراف میں زیادہ تعداد میں پرندے موجود ہیں۔

سی اے اے نے نوٹم میں کہا ہے کہ کپتان لینڈنگ اور ٹیک آف کے دوران خود ہی احتیاط کریں، ایئرپورٹ کے اطراف میں کچرا کنڈیوں کے باعث پرندوں کی تعداد بڑھی ہے۔

سی اے اے حکام کے مطابق کچرا کنڈیوں کے متعلق ضلعی انتظامیہ کو تحریری طور پر  آگاہ کرنے کے باوجود بھی کوئی اقدامات نہیں کیے جا رہے۔

واضح رہے کہ رواں ہفتے کے دوران 3 جہازوں کے انجن پرندوں سے ٹکرانے کے باعث ناکارہ ہوچکے ہیں۔

بشکریہ جنگ