بدھ2؍رجب المرجب 1444ھ25؍جنوری 2023ء

فواد چوہدری کی گرفتاری انتہائی قابل مذمت ہے، فیاض الحسن چوہان

پی ٹی آئی چیئرمین عمران خان کے میڈیا ایڈوائزر فیاض الحسن چوہان نے فواد چوہدری کی گرفتاری پر ردعمل دیتے ہوئے کہا کہ فواد چوہدری کی گرفتاری انتہائی قابل مذمت ہے۔

سماجی رابطے کی ویب سائٹ ٹوئٹر پر جاری کیے گئے بیان میں فیاض الحسن چوہان نے کہا کہ اس طرح کے بزدلانہ اقدام سےحقیقی آزادی کی جنگ کو روکا نہیں جا سکتا۔

انہوں نے کہا کہ عمران خان کو گرفتار کرنے کی کوشش آمرانہ سوچ کی عکاسی ہے، پی ٹی آئی کے کارکن اپنے قائد کی خاطر ہر قسم کی قربانی دینے کو تیار ہیں۔

فیاض چوہان کا کہنا ہے کہ پی ٹی آئی کا کارکن امپورٹڈ حکمرانوں کا ہر ظلم برداشت کرنے کو تیار ہے۔

واضح رہے کہ پاکستان تحریک انصاف کے رہنما فواد چوہدری کو لاہور سے اسلام آباد پولیس نے گرفتار کیا گیا ہے۔

پاکستان تحریک انصاف کے رہنماؤں کا دعویٰ ہے کہ پارٹی رہنما فواد چوہدری کو نامعلوم افراد نے ان کے گھر سے حراست میں لے لیا ہے۔

پولیس ذرائع کا کہنا ہے کہ فواد چوہدری کو ٹھوکر نیاز بیگ کے قریب ان کی رہائش گاہ سے گرفتار کیا گیا ہے، انہیں اسلام آباد لے جایا جائے گا۔

فواد چوہدری کے خلاف مقدمہ گزشتہ رات تھانہ کوہسار میں درج کیا گیا ہے، ان پر مقدمہ سیکریٹری الیکشن کمیشن عمر حمید کی درخواست پر درج کیا گیا ہے۔

مقدمے کے متن میں تحریر ہے کہ فواد چوہدری نے کہا تھا کہ الیکشن کمیشن کی حیثیت ایک منشی کی ہوگئی ہے، جو لوگ نگراں حکومت میں لگ رہے ہیں ان کا سزا ہونے تک پیچھا کریں گے۔

بشکریہ جنگ
You might also like

Comments are closed.