عوام کے مسائل کا حل صرف آئین کی بالادستی میں ہے، شاہد خاقان

پاکستان مسلم  لیگ ن کے رہنما شاہد خاقان عباسی کا کہنا ہے کہ چوری شدہ الیکشن کی پیداوار جب حکمران ہوں تو ملک کا حال آج جیسا ہوتا ہے۔

 کلر سیداں میں پارٹی ورکرز سے خطاب کرتے ہوئے شاہد خاقان نے کہا کہ ہمارا کسی سے کوئی اختلاف یا لڑائی نہیں ہے، ہمارا مطالبہ آئین کی بحالی اور ملک کو ضابطے سے چلانے کا ہے۔

 شاہد خاقان عباسی نے کہا کہ دنیا میں پاکستان کا نام روشن اور با وقار انداز میں نواز شریف کے دور میں لیا گیا، پاکستان کی ترقی اور عوام کے مسائل کا حل صرف آئین کی بالادستی میں ہے۔

رہنما مسلم لیگ ن نے کہا کہ دنیا میں جہاں کہیں 2018 کی طرح الیکشن چوری ہوا وہاں پاکستان جیسا حال ہوا، عمران خان کی تقاریر میں سے کسی ایک میں بھی مہنگائی کا ذکر نہیں ہوا۔

شاہد خاقان عباسی نے کہا کہ بجلی ڈھائی گنا، گیس تین گنا مہنگی ہوگئی ہے، چینی 110 روپے کلو آئین کی خلاف ورزی اور الیکشن چوری کے سبب ہے۔

انہوں نے کہا کہ دھرنوں کے ذریعے سی پیک اور ملکی ترقی کو روکنے کی کوشش کی گئی، جو 2017 میں ہوا اس کے اثرات آج بھی عوام بھگت رہے ہیں، کوئی بتا دے کیا گزشتہ تین سال میں کسی پیمانے پر ملک میں ترقی ہوئی؟۔

شاہد خاقان نے کہا کہ آج صرف ایک جماعت ن لیگ ہے جو اصولوں پر چلتی ہے، ہم جانتے ہیں ملک کے مسائل کا حل ووٹ کی عزت میں ہے۔

بشکریہ جنگ