عوام تفریح کیلئے ساحل پر جانے سے گریز کریں: این ڈی ایم اے

نیشنل ڈیزاسٹر مینجمنٹ اتھارٹی (این ڈی ایم اے) نے سمندری طوفان بائپرجوائے کے پیشِ نظر تمام اداروں کو الرٹ رہنے کی ہدایت کر دی اور عوام سے اپیل کی ہے کہ وہ سیر و تفریح کے لیے ساحلِ سمندر پر جانے سے گریز کریں۔

نیشنل ڈیزاسٹر مینجمنٹ اتھارٹی کے اعلامیے کے مطابق سمندری طوفان بائپرجوائے 140 کلو میٹر فی گھنٹہ کی رفتار سے پاکستان کی ساحلی پٹی کی جانب بڑھ رہا ہے۔

این ڈی ایم اے کے ترجمان نے کہا ہے کہ بائپر جوائے کراچی کے جنوب میں موجود ہے، جو اگلے 24 گھنٹوں میں مزید شدت اختیار کر سکتا ہے۔

ترجمان کا کہنا ہے کہ سمندری طوفان 13 جون تک ممکنہ طور پر سندھ کے جنوب اور جنوب مشرقی حصے پر اثر انداز ہو سکتا ہے۔

چیف میٹرولوجسٹ سردار سرفراز نے کہا ہے کہ بائپرجوائے ایکسٹریملی سیویئر سائیکلونک اسٹارم بن چکا ہے، جو کراچی کے جنوب میں 770 کلو میٹر دور ہے۔

انہوں نے کہا ہے کہ سمندری طوفان سے ساحلی علاقوں میں تیز آندھی آ سکتی اور طوفانی بارشیں ہو سکتی ہیں۔

این ڈی ایم اے کے ترجمان کا کہنا ہے کہ محکمۂ موسمیات، صوبائی ڈیزاسٹر مینجمنٹ اتھارٹیز اور متعلقہ اداروں سے رابطے میں ہیں، تمام اداروں کو کسی بھی قسم کی ہنگامی صورتِ حال سے نمٹنے کے لیے تیار رہنے کی ہدایت کی ہے۔

ترجمان نے یہ بھی کہا ہے کہ ماہی گیر بھی کھلے سمندر میں جانے سے گریز کریں، کسی بھی ہنگامی صورتِ حال میں مقامی انتظامیہ کی ہدایات پر عمل کریں۔

بشکریہ جنگ