عمران خان حکومت میں ہوتے تو پاکستان ڈیفالٹ ہو جاتا: امیر مقام

وزیرِ اعظم شہباز شریف کے مشیر انجینئر امیر مقام کا کہنا ہے کہ اگر آج تک عمران خان حکومت میں ہوتے تو پاکستان کو ڈیفالٹ ہونا تھا۔

کراچی میں وزیرِ اعظم شہباز شریف کے مشیر انجینئر امیر مقام نے مزارِ قائد پر حاضری دی، فاتحہ خوانی کی، پھول رکھے اور مہمانوں کی کتاب میں تاثرات درج کیے۔

اس موقع پر انہوں نے میڈیا سے گفتگو کرتے ہوئے سوال کیا کہ سابق وزیرِ اعظم عمران خان اپنے دورِ حکومت کی کارکردگی بتائیں۔

امیر مقام کا کہنا تھا کہ ایسا آپریشن بھی نہیں ہوگا، جس سے عوام کو مشکلات ہوں، امن کے لیے عوام کی آواز ہر فورم پر اٹھائیں گے۔

انجینئر امیر مقام کا مزید کہنا ہے کہ عمران خان کے قول و فعل میں تضاد ہے، جبکہ ہم سیاست کے لیے نہیں ملک بچانے کے لیے آئے ہیں۔

وزیرِ اعظم شہباز شریف کے مشیر نے یہ بھی کہا کہ سیلاب زدگان کی بحالی ہماری ترجیح ہے، حکومت کی پالیسیوں کے تحت معیشت مستحکم ہو رہی ہے۔

بشکریہ جنگ