سندھ میں بلدیاتی انتخابات کے دوران تیز بارش کا امکان

محکمۂ موسمیات کا کہنا ہے کہ سندھ میں بلدیاتی انتخابات کے دوران مون سون کا تیسرا اسپیل برس سکتا ہے، مون سون کا تیسرا سسٹم 23 سے 26 جولائی سے سندھ پر اثر انداز ہوسکتا ہے۔

محکمۂ موسمیات کے مطابق 24 تا 26 جولائی کراچی میں تیز بارشوں کی پیشگوئی کی گئی ہے، مون سون کے پہلے فیز میں 15 اگست تک بارشوں میں شدت کی پیشگوئی کی گئی ہے۔

دوسری جانب جیو نیوز سے بات کرتے ہوئے چیف میٹرولوجسٹ سردار سرفراز کا کہنا ہے کہ آج سے شروع ہونے والا مون سون کا تیسرا سسٹم مضبوط ہے، یہ سسٹم ملک کے 80 فیصد حصے میں تیز بارشوں کا باعث بنے گا۔

رپورٹس کے مطابق 18 جولائی تک بارشوں کا سلسلہ چل سکتا ہے، 23 جولائی سے نیا سسٹم ملک میں داخل ہوگا۔

سردار سرفراز کا کہنا ہے کہ ملک کے بالائی حصے میں آج رات سے یہ سسٹم اثر انداز ہوسکتا، کل صبح سے سسٹم جنوبی پنجاب اور بلوچستان میں اثرانداز ہو گا۔

انہوں نے کہا کہ 23 سے 26 جولائی کے دوران سندھ میں تیز بارشوں کا امکان ہے جبکہ کراچی میں 24 سے 26 جولائی کے دوران تیز بارشوں کا امکان ہے۔

سردار سرفراز کا مزید کہنا ہے کہ سسٹم کا زیادہ تر حصہ زمین پر ہونے کے باعث اس کی شدت زیادہ ہے، خلیج بنگال سے نم ہوائیں مون سون سسٹم کو مضبوط کر رہی ہیں۔

چیف میٹرولوجسٹ کا یہ بھی کہنا ہے کہ بھارت کے بعد اسے بحیرہ عرب سے نمی کی سپورٹ رہے گی۔

واضح رہے کہ بلدیاتی انتخابات کے دوسرے مرحلے میں 24 جولائی کو کراچی اور حیدرآباد میں انتخابات ہونے ہیں۔

بشکریہ جنگ