سابق پولیس انسپکٹر چاند نیازی قتل کیس، تحقیقاتی رپورٹ تیار

سابق پولیس انسپکٹر چاند خان نیازی کے قتل پر پولیس کی تحقیقاتی رپورٹ تیار کرلی گئی، تحقیقاتی رپورٹ میں ارشد پپو گینگ اور چاند خان نیازی قتل کے محرکات شامل کیے گئے ہیں۔

تحقیقاتی رپورٹ کے مطابق چاند خان نیازی قتل میں ارشد پپو کا بیٹا عالم گرفتار ہوا، عالم کے ساتھ قتل میں اس کا خالہ زاد آذان بھی ملوث تھا، ملزم آذان کے ایران فرار ہونے کی اطلاعات ہیں۔

رپورٹ کے مطابق ملزم آذان کا والد عنایت بھی گینگ وار میں قتل ہوچکا ہے، ملزم آذان 2019 میں پولیس کے ہاتھوں گرفتار ہوچکا ہے۔

 تحقیقاتی رپورٹ میں کہا گیا ہے کہ ارشد پپو گروہ کی سربراہی بلال عرف حمزہ کررہا ہے، گروہ میں اس وقت 10 سے زائد اہم کمانڈر شامل ہیں۔

رپورٹ کے مطابق  انسپکٹر جاوید بلوچ کو طلحہ عرف جہانگیر نے قتل کیا تھا، طلحہ عرف جہانگیر مبینہ طور پر گلستان جوہر میں روپوش ہے، کمانڈر جان محمد ڈی آئی جی ناصر آفتاب کو ٹارگٹ کرنا چاہتا ہے۔

تحقیقاتی رپورٹ میں بتایا گیا کہ جان محمد افغانستان سے تربیت لے چکا ہے، ارشد پپو گینگ کا اسلحہ سنبھالتا ہے، جان محمد ارشد پپو کے بھائی کا بدلہ ڈی آئی جی ناصر آفتاب سے لینا چاہتا ہے۔

رپورٹ کے مطابق  ارشد پپو کا دوسرا بیٹا غازی عرف ساحل بھی ایران میں ہے، یعقوب عرف ماما کا نام ریڈ بک میں بھی شامل ہے، ارشد پپو گینگ کے کارندے کراچی، بیلا، حب اور ایران میں موجود ہیں۔

بشکریہ جنگ