داسو، چینی کمپنی سے نکالے گئے پاکستانی ملازمین بحال

واٹر اینڈ پاور ڈیولپمنٹ اتھارٹی (واپڈا) کے ترجمان کا کہنا ہے کہ داسو پراجیکٹ پر کام کرنے والی چینی کمپنی نے پاکستانی ملازمین کو نکالنے کا نوٹس واپس لے لیا۔

یہ بات واپڈا کے ترجمان نے چینی کمپنی کی جانب سے پاکستانی ملازمین کو نکالنے کے معاملے کے حوالے سے جاری کیئے گئے ایک اعلامیئے میں کہی ہے۔

وفاقی وزیرِ داخلہ شیخ رشید احمد کا کہنا ہے کہ داسو واقعے کی تحقیقات آخری مراحل میں ہیں، چین کے 15 حکام تحقیقات کے لیے پاکستان پہنچے ہیں، واقعے کی تحقیقات میں چین کی وزارتِ داخلہ کو آن بورڈ لیا ہے، چینی وزیرِ داخلہ نے بھی مجھ سے اس معاملے پر بات کی ہے، چین کی دوستی ہر موسم کی دوستی ہے۔

ترجمان واپڈا کے اعلامیئے کے مطابق داسو واقعے کے بعد سول انتظامیہ، واپڈا اور چینی کمپنی نے باہمی مشاورت کی ہے، چینی کمپنی عنقریب داسو پراجیکٹ پر تعمیراتی کام دوبارہ شروع کر دے گی۔

ترجمان واپڈا نے بتایا ہے کہ باہمی مشاورت سے تعمیراتی کام چند دنوں کے لیے معطل کیا گیا تھا، پراجیکٹ پر کام کی بندش کا مقصد حفاظتی اقدامات کو ازسرِ نو منظم کرنا تھا۔

کوہستان میں چینی انجینئروں کی ہلاکت کے بعد چینی کمپنی ’چائنا گیزوبا گروپ کمپنی‘ نے داسو ڈیم پر کام بند کر دیا۔

واپڈا کے ترجمان کا یہ بھی کہنا ہے کہ اس دوران واپڈا چینی کمپنی کے حکام کے ساتھ مسلسل رابطہ میں رہا، واپڈا کی کوششوں کا مقصد داسو پراجیکٹ پر تعمیراتی کام کی جلد بحالی تھا۔

بشکریہ جنگ