حفیظ شیخ کا پاکستان میں کوئی اسٹیک نہیں تھا: محمد زبیر

سابق وزیراعظم نواز شریف کے ترجمان محمد زبیر نے کہا ہے کہ سابق وزیر خزانہ ڈاکٹر حفیظ شیخ کا پاکستان میں کوئی اسٹیک نہیں تھا اور اُن کے تمام اثاثے اور فیملی بھی باہر تھی۔

پروگرام ’جیو پاکستان‘ میں گفتگو کرتے ہوئے محمد زبیر نے کہا کہ حفیظ شیخ جب بھی پاکستان آئے وزارت سنبھالنے آئے اور جب بھی وزارت ختم ہوتی ہے وہ واپس چلے جاتے ہیں۔

محمد زبیر نے کہا کہ حماد اظہر کی تقرری کا خیر مقدم کرتے ہیں، حماد اظہر عوام کے نمائندے اور جواب دہ ہیں، وہ جونیئر بھی ہیں اور اُن کے لیے چیلنجز بھی بہت ہیں۔

اُنہوں نے یہ بھی کہا کہ اگر کوئی سمجھتا ہے معیشت کے چیلنج حل ہوجائیں گے تو ایسا کچھ نہیں ہورہا بلکہ پاکستان کی معیشت خراب سے خراب ہوجائے گی۔

محمد زبیر نے کہا کہ شبلی فراز نے خود کہا مہنگائی کی وجہ سے حفیظ شیخ کو نکالا گیا جب سے پی ٹی آئی کی حکومت آئی منہگائی بڑھتی چلی گئی۔

اُن کا کہنا تھا کہ لگتا نہیں کہ حفیظ شیخ کے جانے سے منہگائی کم ہو جائے گی جبکہ حکومت کا مہنگائی تسلیم کرنا ہماری سب سے بڑی فتح ہے۔

ترجمان نواز شریف نے مزید کہا کہ خطے میں پاکستان میں مہنگائی کی شرح ڈبل سے زیادہ ہے۔

بشکریہ جنگ