بغیر اجازت موبائل فون صارفین کا ڈیٹا تشہیری کمپنیز کو دینے پر جرمانہ ہوگا

موبائل فون صارفین کی شکایت پر وزیرِ اعظم شہباز شریف کا بڑا اقدام سامنے آیا ہے، بغیر اجازت صارفین کا ڈیٹا تشہیری کمپنیز کو دینے پر جرمانہ ہوگا۔

وزیرِ اعظم کی ہدایت پر پاکستان ٹیلی کمیونیکیشن اتھارٹی (پی ٹی اے) نے صارفین کے ڈیٹا کے تحفظ کیلئے عملی اقدامات کا نفاذ شروع کردیا۔

سربراہ اسٹریٹجک ریفارمز سلمان صوفی نے بتایا کہ موبائل فون صارفین کا ڈیٹا بغیر اجازت تشہیری کمپنیوں کو فراہم کرنے پر پی ٹی اے کو ٹیلی کمیونیکیشن کمپنیز کے خلاف جرمانہ عائد کرنے ہدایت دی گئی ہے۔

انہوں نے کہا کہ جون کے آخر تک اس حوالے سے تمام تکنیکی ضابطے مکمل کر لیے جائیں گے۔

سلمان صوفی کا کہنا تھا کہ تشہیری میسیجز کو وصول کرنے یا ان پر پابندی لگانے کا مکمل اختیار موبائل فون صارف کو فراہم کر دیا گیا ہے۔

مزید اصلاحات کیلئے اگلے ماہ جولائی میں صارفین کی کانفرنس میں مزید تجاویز کو پالیسی کا حصہ بنا کر اطلاق کیا جائے گا۔

انہوں نے مزید کہا کہ پاکستان میں پہلی مرتبہ حکومت سنجیدگی سے صارفین کے ڈیٹا کے تحفظ کیلئے اقدامات اٹھا رہی ہے۔

بشکریہ جنگ