بابر اعظم کے والد کا بیٹے پر تنقید کرنے والوں کو مشورہ

پاکستان کرکٹ ٹیم کے کپتان بابر اعظم کے والد اعظم صدیقی نے اپنے بیٹے کے لیے دعا کی اور تنقید کرنے والوں کو مشورہ دیا ہے۔

سوشل میڈیا اکاؤنٹ پر بابر اعظم اور ان کی کامیابی سے متعلق تصویر شیئر کرتے ہوئے اعظم صدیقی نے لکھا کہ یہ تصویر کسی نے کیا ہی اچھی بنائی اُن لوگوں کے لیے۔

اعظم صدیقی نے لکھا کہ ان ریکارڈز کے ساتھ بابر کا ورلڈ ریکارڈ ہے سب سے لمبے وقت تک ٹی ٹوئنٹی نمبر 1 رہنے کا اور 2 مرتبہ نمبر 1 اور 2 سنچریوں کا بھی ۔

بابر اعظم کے والد نے لکھا کہ میرا خیال ہے یہ سب کچھ حادثاتی طور پر نہیں ہوتا اللّٰہ کا کرم شدید محنت سے ممکن ہے،  وقت ایک جیسا نہیں رہتا، بُرا تھا چلا گیا۔

انہوں نے مزید لکھا کہ پوری دنیا کے لیجنڈز بابر کی کپتانی کو سراہ رہے ہیں اور ہمارے ماضی کے بابر کو اُلٹے سیدھے مشورے دے رہے ہیں، اُن کو مشورہ ہے کہ آرام سے بیٹھیں۔

کپتان کے والد نے مزید لکھا کہ بابر کا ریکارڈ ٹی ٹوئنٹی میں اب تک کے تمام پاکستانی لیجنڈز سے اچھا ہے اور دعا ہے کہ اچھا ہی رہے۔

اعظم صدیقی نے اپنی پوسٹ میں لکھا کہ بابر اللّٰہ کی رحمت سے کپتان بنا اور اللّٰہ نے جب تک چاہا وہ کپتان رہے گا انشاء اللّٰہ پاکستان زندہ باد۔

یاد رہے کہ پاکستان کرکٹ ٹیم رواں ماہ آسٹریلیا میں کھیلے گئے ٹی ٹوئنٹی ورلڈ کپ کے فائنل تک پہنچنے میں کامیاب ہوگئی تھی مگر ورلڈ کپ گھر لانے میں ناکام رہی ۔ 

بشکریہ جنگ