اسلام آباد میں فائرنگ، سنی علما کونسل کے مولانا مسعود الرحمان شہید

ترجمان سنی علما کونسل کا کہنا ہے کہ اسلام آباد کے علاقے غوری ٹاؤن میں نامعلوم افراد کی فائرنگ سے مولانا مسعود الرحمان شہید ہوگئے ہیں۔

 غوری ٹاؤن میں نا معلوم موٹر سائیکل سواروں کی فائرنگ سے شہید ہونے والے مولانا مسعود الرحمان سنی علما کونسل کے مرکزی ڈپٹی جنرل سیکریٹری ہیں۔

اسلام آباد پولیس کا کہنا ہے کہ تھانہ کھنہ کے علاقہ غوری ٹاون میں گاڑی پر فائرنگ کا واقعہ پیش آیا، جس سے ایک شخص جاں بحق، ایک زخمی ہوگیا۔

پولیس کا کہنا ہے کہ جاں بحق شخص کی شناخت مولانا مسعود الرحمن عثمانی کے نام سے ہوئی ہے، پولیس کی بھاری نفری موقع پر موجود ہے، سی سی ٹی وی کیمروں کی مدد سے ملزمان کو ٹریس کیا جا رہا ہے۔

ترجمان اسلام آباد پولیس کا کہنا ہے کہ جلد ملزمان کو گرفتار کرکے قانون کے کٹہرے میں لایا جائے گا۔

بشکریہ جنگ