آزاد کشمیر الیکشن میں جیت شفافیت اور دیانتداری کی فتح ہے، عثمان بزدار

وزیراعلیٰ پنجاب سردار عثمان بزدار کی آزاد کشمیر الیکشن میں کامیابی پر تحریک انصاف کے امیدواروں کو مبارکباد دیتے ہوئے کہنا ہے کہ آزاد کشمیر کے عوام نے وزیر اعظم عمران خان کی سچی اور ایماندار قیادت پر اپنے بھرپور اعتماد کا اظہار کیا ہے، آزاد کشمیر الیکشن میں جیت شفافیت اور دیانتداری کی فتح ہے۔

 عثمان بزدار نے اپنے ایک بیان میں کہا ہے کہ گلگت بلتستان کے بعد آزاد کشمیر میں بھی عوام نے چوروں اور لٹیروں کی منفی سیاست کومسترد کر دیا ہے، مخالف جماعتوں کے ریاست مخالف بیانیے کو عبرتناک شکست ہوئی ہے، آزاد کشمیر کے عوام نے کرپشن زدہ عناصر کے تابوت میں آخری کیل ٹھونک دی ہے۔

غیر سرکاری اور غیر حتمی نتائج کے مطابق تحریک انصاف نے 25 نشستیں جیت لیں ۔ پیپلز پارٹی 9 اور (ن) لیگ 6 نشستوں پر کامیاب رہی

عثمان بزدار نے کہا ہے کہ الیکشن کے نتائج نے ثابت کردیا ہے کہ عوام تحریک انصاف کی قیادت اورپالیسیوں پر اعتماد کرتے ہیں، ثابت ہو گیا کہ کشمیری عوام شفاف اور عوام کی خدمت کرنے والی مخلص قیادت کے ساتھ ہیں۔

انہوں نے مزید کہا ہے کہ تحریک انصاف کی اب تک کی شاندار کارکردگی کی بدولت آزاد کشمیر کے عوام میں سرخرو کیا ہے، کامیابی نئے پاکستان اور تبدیلی کے ایجنڈے کی جیت ہے۔

پاکستان پیپلزپارٹی کے چیئرمین بلاول بھٹو زرداری کا گزشتہ روز آزاد کشمیر میں ہونے والے میں الیکشن سے متعلق کہنا ہے کہ پاکستان تحریک انصاف (پی ٹی آئی) نے آزاد کشمیر کےانتخابات میں تشدد اور دھاندلی کا سہارا لیا ہے۔

اُن کا کہنا تھا کہ نتائج مخالف جماعتوں کے لیے نوشتہ دیوار ہے، مخالف جماعتوں کو شور مچانے کی بجائے جمہوری اقدار کا ثبوت دینا چاہیے۔

مسلم لیگ نون کی نائب صدر مریم نواز کا کہنا ہے کہ انہوں نے انتخابی نتائج تسلیم نہیں کیے اور نہ ہی وہ نتائج تسلیم کریں گی۔

سردار عثمان بزدار نے کہا ہے کہ جہاں جیت گئے وہ ٹھیک، جہاں ہار گئے وہاں دھاندلی، یہ روش اب نہیں چلے گی، آزاد کشمیر میں جمہوری روایات کا عَلم بلند ہوا ہے، اپوزیشن کی قسمت میں صرف رونا لکھا ہے اور وہ 2023ء تک روتے ہی رہیں گے۔

بشکریہ جنگ