ہم اپنے مطالبات بند کمروں میں عمران خان کے سامنے رکھیں گے، فہمیدہ مرزا

وفاقی وزیر فہمیدہ مرزا نے کہا ہے کہ ہم جمہوریت کے تسلسل کے لیے وزیراعظم عمران خان کے ساتھ ہیں، ہم اپنے مطالبات بند کمروں میں  عمران خان کے سامنے رکھیں گے۔

ایوان میں اظہار خیال کرتے ہوئے فہمیدہ مرزا نے کہا کہ وزیراعظم عمران خان کو مبارکباد دیتی ہوں، آپ نے پہلے سے زیادہ ووٹ لیے، ساری اتحادی جماعتیں وزیراعظم کے ساتھ ہیں۔

فہمیدہ مرزا نے کہا کہ وزیر اعظم کو اس طرح ووٹ لینے کی ضرورت نہیں تھی، اگر ایک میکنیزم بنایا جاتا تو شاید یہ نوبت نہ آتی۔

وزیرِ اعظم عمران خان پارلیمنٹ سے اعتماد کا ووٹ حاصل کرنے میں کامیاب ہو گئے، جس کا اعلان اسپیکر اسد قیصر کی جانب سے کیا گیا۔

اُنہوں نے کہا کہ آئین ایک بہت بڑی ذمے داری الیکشن کمیشن پر ڈالتا ہے، اُمید تھی اوپن بیلٹ کی حمایت پورا ایوان کرے گا لیکن ایسا نہیں ہوا اور پارلیمنٹ مضبوط نہیں ہوسکی۔

فہمیدہ مرزا نے یہ بھی کہا کہ آج اپوزیشن میں دو بہت بڑی سیاسی جماعتیں بیٹھی ہیں، ہم نے دیکھا سندھ اسمبلی میں کیسے ووٹ پڑے، کوئی بات نہیں ہورہی۔

اتحادی جماعت ایم کیو ایم پاکستان کے رہنما خالد مقبول صدیقی نے کہا ہے کہ وزیراعظم عمران خان صاحب تبدیلی کے لیے آگے بڑھیں ہم آپ کے ساتھ ہیں، ہم صرف لینے والی سائیڈ پر نہیں اتحادی حکومت کو دینے کی پوزیشن میں ہیں۔

اُنہوں نے کہا کہ اس ایوان سے میرا سوال ہےکہ کیا ہم اسی طرح چلتے رہیں گے؟ اگر ایسے ہی چلنا ہے تو کیوں چارٹر آف ڈیموکریسی پر دستخط کروائے۔

فہمیدہ مرزا نے کہا کہ عوامی مسائل کے لیے پارلیمنٹ استعمال ہو، ذاتی مفاد کے لیے نہیں، خدارا اس ایوان کو آئین کے تحت چلائیں۔

اُنہوں نے مزید کہا کہ خدارا ایوان میں اسپیکر، وزیراعظم اور اپوزیشن لیڈر کی عزت کریں۔

واضح رہے کہ وزیرِ اعظم عمران خان پارلیمنٹ سے اعتماد کا ووٹ حاصل کرنے میں کامیاب ہوگئے، جس کا اعلان اسپیکر اسد قیصر کی جانب سے کیا گیا۔

اسپیکر قومی اسمبلی نے اعلان کیا کہ وزیرِ اعظم عمران خان پر 178 ارکان نے اعتماد کا اظہار کیا ہے۔

بشکریہ جنگ