پاکستان کے 7 کھلاڑی آؤٹ، لیڈ بڑھانے کا سلسلہ جاری

راولپنڈی ٹیسٹ کے چوتھے روز کے کھیل کا آغاز پاکستان کے لیے مایوس کن رہا اور اس کی ساتویں وکٹ 159 رن پر گر گئی، پاکستان نے دوسری اننگز میں جنوبی افریقا پر اپنی برتری 230 رنز سے بڑھالی ہے۔

پاکستان کے ساتویں آؤٹ ہونے والے کھلاڑی حسن علی تھے وہ 5 رنز ہی بنا سکے، کشوو مہاراج نے انہیں ایل بی ڈبلیو کیا۔

جنوبی افریقا کے جارج لنڈے اور کشوو مہاراج نے اب تک تین ،تین وکٹ حاصل کی ہیں جبکہ ایک وکٹ ربادا نے لی ہے۔

واضح رہے کہ پاکستان نے پنڈی ٹیسٹ کے تیسرے روز کھیل کے اختتام پر 129 رنز بنائے تھے اور اس کی  6 وکٹیں گری تھیں، تاہم قومی ٹیم کو جنوبی افریقا کے خلاف مجموعی طور پر 200 رنز کی سبقت حاصل تھی۔

قومی ٹیم کے دوسری اننگ میں صفر پر نوجوان بیٹسمین عمران بٹ، پھر 28 کے مجموعے پر عابد علی بھی پویلین لوٹ گئے، ایسے میں شائقین کی امیدوں کا مرکز بابر اعظم تھے جو 45 کے مجموعے پر صرف 8 رنز بنا کر کیشو مہاراج کا شکار ہوگئے۔

اظہر علی جنہوں نے 33 رنز بنائے تھے، وہ بھی بڑا اسکور کرنے میں ناکام رہے اور 63 رنز پر آؤٹ ہوگئے۔

اس کے بعد فواد عالم نے کمان سنبھالی اور وہ صرف 12 رنز بنانے کے بعد آؤٹ ہوئے جس کے بعد قومی ٹیم 76 پر ہی آدھی وکٹوں سے محروم ہوگئی تھی۔

ایسے میں فہیم اشرف اور محمد رضوان نے 52 رنز کی پارٹنر شپ بنائی لیکن 128 کے مجموعے پر فہیم اشرف بھی پولین لوٹ گئے۔

دن کے اختتام تک محمد رضوان 28 اور حسن علی بغیر کوئی رن بنائے کیریز پر موجود تھے۔

اس سے قبل پاکستانی بولنگ اٹیک کے سامنےمہمان ٹیم پہلی اننگ میں 201 رنز پر پولین لوٹ گئی تھی، فاسٹ بولر حسن نے شاندار بولنگ کا مظاہرہ کرتے ہوئے جنوبی افریقا کے 5 کھلاڑیوں کو آؤٹ کیا۔

بشکریہ جنگ