افغان وزارت دفاع کی بگرام ایئربیس سے امریکی اتحادی افواج کے انخلا کی تصدیق

ترجمان افغان وزارت دفاع نے بگرام ایئربیس سے امریکی اتحادی افواج کے انخلا کی تصدیق کردی ہے اور کہا بگرام ایئر بیس کا کنٹرول باضابطہ طور پر افغان فورسز کے حوالے کردیا گیا ہے۔

ادھر طالبان نے بھی امریکا کے بگرام ایئربیس خالی کرنے کا خیر مقدم کیا ہے۔

ترجمان افغان وزارت دفاع کا کہنا ہے امریکی، اتحادی افواج نے گذشتہ رات بگرام ایئربیس خالی کیا، جس کے بعد بگرام ایئربیس افغان فوج کے حوالے کردی گئی ہے۔

افغان فوج اب بگرام ایئربیس دہشتگردی کیخلاف جنگ کیلئے استعمال کرے گی۔

دوسری جانب طالبان نے بگرام ایئر بیس سے امریکی اتحادی افواج کے انخلا کا خیر مقدم کرتے ہوئے کہا ہے کہ امریکی افواج کا مکمل انخلا افغانوں کیلئے مستقبل کے بارے میں فیصلہ کرنے کی راہ ہموار کرے گا۔

بشکریہ جنگ