احد چیمہ کو عہدے سے ہٹانے کی تجویز صدر مملکت کو ارسال
نگراں وزیر اعظم انوارالحق کاکڑ نے احد چیمہ کو عہدے سے ہٹانے کی تجویز صدر مملکت ڈاکٹر عارف علوی کو ارسال کر دی۔
کابینہ ڈویژن کی بھیجی گئی سمری میں کہا گیا کہ الیکشن کمیشن نے احد چیمہ کو عہدے سے ہٹانے کا فیصلہ دیا تھا۔
دوسری جانب الیکشن کمیشن کے احکامات پر انسپکٹر جنرل (آئی جی) اسلام آباد اور ڈپٹی کمشنر کو ہٹا دیا گیا۔ سیکریٹری اسٹیبلشمنٹ کو سیکریٹری وزیراعظم خرم آغا نے مراسلہ بھیجا ہے۔
اس مراسلے میں کہا گیا کہ اسٹیبلشمنٹ ڈویژن آئی جی اور ڈی سی اسلام آباد کی جگہ تعیناتی کےلیے پینل آف آفیسرز تجویز کرے۔
الیکشن کمیشن نے آئی جی اسلام آباد اور ڈی سی اسلام آباد کے خلاف سیاسی جماعتوں کی جانب سے شکایات پر دونوں کو اپنے عہدوں سے ہٹانے کا حکم دیا تھا۔
تاہم دونوں کو واضح احکامات کے باوجود عہدوں سے نہ ہٹائے جانے پر الیکشن کمیشن نے سیکریٹری اسٹیبلشمنٹ کو 26 دسمبر کو طلب کر رکھا تھا۔
Comments are closed.