حکومت ملی تو سودی نظام کا خاتمہ کریں گے، سراج الحق

جماعت اسلامی کے امیر سراج الحق نے کہا ہے کہ حکومت ملی تو سودی نظام کا خاتمہ کریں گے۔ خواتین کےلیے علیحدہ اسکولز، کالجز اور جامعات بنائیں گے۔

انہوں نے ان خیالات کا اظہار لیہ میں خواتین ورکرز کنونشن سے خطاب کے دوران کیا۔ 

امیر جماعت اسلامی سراج الحق کا کہنا تھا کہ لیہ کی تاریخ میں خواتین کا یہ سب سے بڑا ورکرز کنونشن ہے۔

سراج الحق نے کہا کہ جب سے پاکستان بنا ہے جنوبی پنجاب میں جاگیر داروں کی حکمرانی ہے۔ جنہوں نے جاگیر داروں کو چیلنج کیا ہے ان کی دعوت پر لیہ آیا ہوں۔ 

امیر جماعت اسلامی نے کہا کہ غزہ میں فلسطینی بچے اسرائیلی ٹینکوں کے سامنے کھڑے ہیں۔ ہم نے فلسطین کےلیے اسلام آباد میں امریکی سفارتخانہ کے باہر احتجاج ریکارڈ کرایا۔ 

انہوں نے کہا کہ جماعت اسلامی کی حکومت ہوتی تو نہ ڈاکٹر عافیہ قید ہوتی نہ کشمیر پر قبضہ ہوتا۔ 

امیر جماعت اسلامی نے کہا حکومت ملی تو سودی نظام کا خاتمہ کریں گے۔ خواتین کے لیے علیحدہ اسکولز، کالجز اور جامعات بنائیں گے۔ 

انہوں نے کہا کہ جب پاکستان میں جماعت اسلامی کی حکومت ہوگی تعلیم مفت ہوگی۔ ہماری حکومت میں جو والد اپنی بچی کو تعلیم سے محروم کرے گا وہ جیل جائے گا۔ ہم یکساں تعلیمی نظام متعارف کرائیں گے۔

سراج الحق نے کہا کہ کرپشن ختم کرکے 300 یونٹ تک بجلی مفت فراہم کریں گے۔

بشکریہ جنگ