ججز کو استحقاق کمیٹی میں بلانے کا ابھی فیصلہ نہیں ہوا، فاروق ایچ نائیک

پاکستان پیپلز پارٹی (پی پی پی) کے رہنما سینیٹر فاروق ایچ نائیک نے کہا ہے کہ ججز کو استحقاق کمیٹی میں بلانے کا ابھی فیصلہ نہیں ہوا۔

 جیو نیوز کے پروگرام ’کیپٹل ٹاک‘ میں گفتگو کرتے ہوئے فاروق ایچ نائیک نے کہا کہ شہری کا حق بنتا ہے کہ فیصلہ ڈسکس کرے۔

 پی پی پی رہنما نے کہا کہ ججز کو استحقاق کمیٹی میں بلانے کی تجویز دی گئی ہے، لیکن ججز کو استحقاق کمیٹی میں بلانے کا ابھی فیصلہ نہیں ہوا۔

فاروق ایچ نائیک نے کہا کہ وزارت دفاع نے یہ نہیں کہا کہ الیکشن میں سیکیورٹی نہیں دینا چاہتے، وزارت دفاع نے کہا کہ اس وقت حالات ایسے ہیں کہ سیکیورٹی دینے سے قاصر ہیں۔

واضح رہے کہ گزشتہ روز رکن قومی اسمبلی محسن داوڑ نے پوری پارلیمنٹ کو استحقاق کمیٹی کا درجہ دے کر ججوں کو بلانے کا مطالبہ کیا تھا۔

محسن داوڑ کا کہنا تھا کہ پارلیمنٹ کی توہین پر تحریک استحقاق کی باتیں ہوئیں، پوری پارلیمنٹ کو ہی کمیٹی ڈکلیئر کر دیں، پارلیمنٹ کی توہین کرنے والوں کو پارلیمنٹ میں ہی بلایا جائے۔

بشکریہ جنگ