تھریٹ الرٹس جاری ہونے پر مخصوص مقامات پر کنٹینرز لگائے گئے، عامر میر

نگراں وزیر اطلاعات پنجاب عامر میر نے کہا ہے کہ پولیس نے لاہور میں جلسہ گاہ جانے والے راستے بند نہیں کیے۔

لاہور میں میڈیا سے گفتگو کرتے ہوئے عامر میر نے کہا کہ رکاوٹیں کھڑی کر کے لوگوں کو جلسے میں جانے سے نہیں روکا گیا، تھریٹ الرٹس جاری ہونے پر مخصوص مقامات پر کنٹینرز لگائے گئے۔

عامر میر کا کہنا ہے کہ عوامی اجتماعات کی صورت میں دہشت گردی کے خطرات بڑھ جاتے ہیں، قانون نافذ کرنے والے اداروں کی جانب سے شہریوں کو تحفظ دینے کے لیے چیکنگ کی جا رہی ہے۔

پاکستان تحریک انصاف آج مینار پاکستان پر جلسہ کرنے جا رہی ہے لیکن مینار پاکستان گراؤنڈ جانے والے راستے کنٹینرز لگا کر بند کر دیے گئے ہیں۔

انہوں نے کہا کہ کسی بھی سیاسی جماعت کے کارکنوں کو جلسے میں شمولیت سے نہیں روکا جا رہا۔

ان کا کہنا ہے کہ حکومت نے پی ٹی آئی کو جلسہ کرنے کی اجازت دی رکھی ہے۔

بشکریہ جنگ