خواتین کی تعلیم اور ملازمت پر مذاکرات کیلئے او آئی سی علما کا وفد افغانستان جائے گا

افغانستان میں خواتین کی تعلیم اور ملازمت کے حوالے سے مذاکرات کیلئے اسلامی تعاون تنظیم (او آئی سی) علما کا ایک وفد افغانستان بھیجے گی۔

او آئی سی کے سیکریٹری جنرل حسین ابراہیم طحہٰ کا کہنا تھا کہ بین الاقوامی فقہ اکیڈمی کے تعاون سے افغانستان کے متعلقہ حکام سے بات چیت جاری ہے۔

انہوں نے کہا کہ علما کا ایک وفد مذاکرات کیلئے افغانستان جائے گا تاکہ اسلام میں خواتین کی تعلیم اور ملازمت سے متعلق موضوعات پر بات کی جائے۔

ترجمان دفتر خارجہ ممتاز زہرا بلوچ کا کہنا ہے کہ افغانستان میں خواتین کی تعلیم پر پابندی ناقابل قبول ہے۔

موریطانیہ میں 16 سے 17 مارچ تک او آئی سی کا 49 واں اجلاس ہوا جس میں 40 سے زائد ممالک کے نمائندگان نے شرکت کی تھی۔

اس موقع پر افغانستان کے ترجمان ذبیح اللّٰہ مجاہد کا کہنا تھا کہ ہم خواتین کی تعلیم اور ملازمت پر اپنے مسائل کو حل کرنے کی کوشش کر رہے ہیں لیکن اس میں کچھ وقت لگے گا۔

بشکریہ جنگ