فضل الرحمٰن اقتدار سے دوری کے غم میں بھاگ دوڑ کر رہے ہیں، فردوس عاشق اعوان

معاون خصوصی برائے وزیراعلیٰ پنجاب ڈاکٹر فردوس عاشق اعوان کا پی ڈی ایم کے سربراہ مولانا فضل الرحمٰن سے متعلق کہنا ہے کہ فضل الرحمٰن اقتدار سے دوری کا غم دور کرنے کے لیے بھاگ دوڑ کر رہے ہیں۔

ڈاکٹر فردوس عاشق اعوان نے مائیکرو بلاگنگ ویب سائٹ ٹوئٹر پر اپنے ایک بیان میں کہا ہے کہ ‏مولانا آج جاتی امراء شاہی محل میں جعلی راجکماری کے سامنے حاضری ضرور دیں گے۔

جمعیت علمائے اسلام (ف) اور پاکستان ڈیموکریٹک موومنٹ کے سربراہ مولانا فضل الرحمٰن آج پاکستان مسلم لیگ ن کی نائب صدر مریم نواز سےجاتی امراء رائیونڈ میں ملاقات کریں گے۔

فردوس عاشق اعوان نے کہا ہے کہ مولانا پہلے بزدار حکومت کے قائم کردہ ویکسینیشن سینٹرز پر تشریف لائیں، مولانا فضل الرحمٰن اپنی ویکسینیشن کرائیں، مولانا آپ کورونا وائرس سے اور عوام آپ کے ہر قسم کے شر سے محفوظ رہیں۔

انہوں نے مزید کہا کہ حکومت مولانا کی ویکسینیشن کرنے کی منتظر ہے۔

جے یو آئی ف کے سربراہ مولانا فضل الرحمٰن کا کہنا ہے کہ پیپلزپارٹی نے وقت مانگا ہے، کوئی سخت فیصلہ نہیں کرنا چاہتے۔

فردوس عاشق اعوان کا مزید کہنا تھا کہ ‏حکومت شہریوں کو کورونا ویکسین کی فراہمی کے لیے سرتوڑ کوشش کر رہی ہے۔

بشکریہ جنگ