ایلون مسک نے ٹوئٹر صارفین سے ایک اہم سوال پوچھ لیا

معروف امریکی کمپنی ٹیسلا اور اسپیس ایکس کے بانی ایلون مسک نے ٹوئٹر صارفین سے ایک اہم سوال پوچھ لیا ہے۔

 ایلون مسک نے مائیکرو بلاگنگ ویب سائٹ ٹوئٹر پر گزشتہ روز معطل شدہ اکاؤنٹس کی دوبارہ بحالی سے متعلق صارفین کی رائے پوچھی ہے۔

اُنہوں نے سوال پوچھا کہ’کیا ٹوئٹر کو معطل شدہ اکاؤنٹس کے لیے عام معافی کی پیشکش کرنی چاہیئے، بشرطیکہ انہوں نے قانون کی خلاف ورزی نہ کی ہو یا کسی زبردست دھوکا دہی میں ملوث نہ ہوں؟‘

ایلون مسک کی جانب سے شیئر کیے گئے اس پول پر 26 لاکھ سے زائد لوگ اپنی رائے کا اظہار کرچکے ہیں۔

مائیکرو بلاگنگ ویب سائٹ ٹوئٹر کے چیف ایلون مسک نے سابق امریکی صدر ڈونلڈ ٹرمپ کے ٹوئٹر اکاؤنٹ کو بحال کر دیا۔

اس پول کا اختتام ہونے میں ابھی 11 گھنٹے باقی ہیں اور اس وقت تک تمام ٹوئٹر صارفین اپنی رائے کا اظہار کرسکتے ہیں۔

اس سے قبل ایلون مسک نے اسی طرح سابق امریکی صدر ڈونلڈ ٹرمپ کے ٹوئٹر اکاؤنٹ کی بحالی کے لیے بھی ٹوئٹرصارفین کی رائے پوچھی تھی۔

اس پول پر 51.8 فیصد لوگوں نے ڈونلڈ ٹرمپ کے ٹوئٹر اکاؤنٹ کی بحالی کی حمایت میں جبکہ 48.2 فیصد لوگوں نے مخالفت میں ووٹ دیا۔

بشکریہ جنگ