فٹبال ورلڈ کپ شروع ہونے سے 1 دن قبل دفاعی چیمپئن کو دھچکا

قطر میں فیفا فٹبال ورلڈ کپ شروع ہونے سے ایک دن قبل ہی دفاعی چیمپئن کو بڑا دھچکا لگا ہے۔

غیرملکی میڈیا کے مطابق فرانس کے اسٹرائیکر کریم بنزما کو ٹریننگ کے دوران انجری ہوئی ہے، جس کے بعد تصدیق ہو گئی ہے کہ وہ ورلڈ کپ سے باہر ہو گئے ہیں۔

فرانسیسی ٹیم کے کوچ کا کہنا ہے کہ کریم بنزما کے لیے بہت افسردہ ہوں جنہوں نے اس ورلڈ کپ کو ایک اہم مقصد بنایا ہوا تھا۔

انہوں نے کہا کہ ٹیم کو لگنے والے اس دھچکے کے باوجود کھلاڑیوں پر مکمل اعتماد ہے، جو چیلنج ہمارا انتظار کر رہا ہے اس کے لیے سب کچھ کریں گے۔

سابق وزیراعظم عمران خان نے فٹ بال ورلڈ کپ کے کامیاب انعقاد کے حوالے سے قطر کے لیے نیک خواہشات کا اظہار کیا ہے۔

غیر ملکی میڈیا کے مطابق کریم بنزما نے 2014ء ورلڈکپ میں فرانس کی طرف سے سب سے زیادہ گول کیے تھے جبکہ وہ گزشتہ ایونٹ میں ٹیم کا حصہ نہیں تھے۔

رپورٹس کے مطابق کریم بنزما 6 سال بعد گزشتہ سال فرانس کی ٹیم میں واپس آئے تھے، جس کے بعد انہوں نے 16 میچوں میں 10 گولز کیے۔

واضح رہے کہ فیفا فٹبال ورلڈکپ کا پہلا میچ آج میزبان قطر اور ایکواڈور کے درمیان کھیلا جائے گا۔

بشکریہ جنگ