عمران فرحت بابر اور رضوان کی حمایت میں بول پڑے

سابق ٹیسٹ کرکٹر عمران فرحت کا کہنا ہے کہ ٹی ٹوئنٹی ورلڈ کپ سے قبل ٹیم میں تبدیلی کا فائدہ نہیں ہو گا کھلاڑیوں کو بیک کریں ان پر اعتماد کریں گھبرائیں نہیں۔

بائیں ہاتھ کے اوپننگ بیٹسمین عمران فرحت پاکستان جونیئر لیگ میں بہاولپور رائیلز کے کوچ ہیں جبکہ پاکستان کرکٹ بورڈ کے پاتھ وے پروگرام سے بھی منسلک ہیں۔

جیو نیوز سے گفتگو کرتے ہوئے عمران فرحت نے کہا کہ پاکستان کرکٹ ٹیم ٹی ٹوئنٹی ورلڈ کپ میں اچھا کرے گی اور جیتے گی۔

انہوں نے کہا کہ 2 سال سے انہی کھلاڑیوں پر انویسٹ کیا گیا ہے، ان کھلاڑیوں نے ریزلٹ بھی دیے ہیں، اب تبدیلی مناسب نہیں ہو گی، تبدیلی کے بارے میں ورلڈ کپ کے بعد سوچا جائے۔

سابق آل راؤنڈر عبدالرزاق کے بیٹے علی رزاق پاکستان جونیئر لیگ میں بہاولپور رائیلز کی نمائندگی کر رہے ہیں

سابق اوپنر نے بابر اعظم اور محمد رضوان کے اسٹرائیک ریٹ پر ہونے والی تنقید کے بارے میں کہا کہ بابر اعظم اور محمد رضوان ٹیم کی اسٹرینتھ کے مطابق کھیل رہے ہیں، وکٹیں ہاتھ میں ہونا اچھی بات ہے، اوپنر اچھا آغاز دیتے ہیں تو اور کیا چاہیے، اچھے آغاز کے بعد پھر مڈل آرڈر کو اچھا فنش کرنا چاہیے۔

پاکستان جونیئر لیگ سے متعلق گفتگو کرتے ہوئے عمران فرحت نے کہا کہ پی جے ایل سے ماڈرن ڈے کے کرکٹرز ملیں گے، پاکستان ٹیم کو جن چیزوں کی ضرورت ہے وہ آنے والے سالوں میں اس لیگ سے مل جائے گی، کھلاڑیوں میں پروفیشنل ازم آئے گا وہ جلد میچور ہوں گے، اس سے پاکستان کرکٹ کو فائدہ ہی ہے۔

بشکریہ جنگ