کراچی ڈینٹل کلینک فائرنگ: زخمی جوڑا کولکتہ سے پاکستان منتقل ہوا

کراچی میں صدر کے ڈینٹل کلینک میں فائرنگ سے زخمی ہونے والے میاں بیوی قیام پاکستان کے بعد بھارتی شہر کولکتہ سے ہجرت کرکے کراچی منتقل ہوئے جنہیں زندگی بھر کیلئے پاکستانی قومی شناختی کارڈ جاری کیے جاچکے ہیں۔

نادرا ذرائع کے مطابق رچرڈ ہونو پاؤ قیام پاکستان کے بعد 1950 میں بھارت کے شہر کولکتہ میں پیدا ہوئے۔ وہ 25 جولائی کو 72 سال کے ہوگئے۔ ان کے قومی شناختی کارڈ کی آخری مرتبہ 28 مئی 2014 کو لائف ٹائم کیلئے تجدید ہوئی۔ عرصہ دراز سے یہ خاندان کلفٹن بلاک 5 میں رہائش پذیر ہے۔

نادرا ریکارڈ کے مطابق زخمی خاتون ٹیئن پھین زخمی ڈاکٹر رچرڈ ہونو پاؤ کی اہلیہ ہیں جو پاکستان بننے کے 3 ماہ 12 دن بعد 1947 میں کولکتہ میں پیدا ہوئیں۔ وہ اپنے شوہر سے ڈھائی سال بڑی ہیں اور 26 نومبر 2022 کو 75 سال کی ہوجائیں گی۔

کراچی صدر میں ڈینٹل کلینک پر ہونیوالے حملے کی…

نادرا ذرائع کے مطابق ان کے قومی شناختی کارڈ کی 8 اگست 2018 کو آخری مرتبہ تجدید ہوئی جو ان کی آئندہ تمام زندگی قابل استعمال رہے گا۔

خاندانی ذرائع کے مطابق اس جوڑے کے 4 بچے ڈاکٹر ہیں۔ انہوں نے کراچی اور جامشورو میڈیکل کالج سے تعلیم حاصل کی۔ چاروں بچے پاکستانی، امریکن اور کینیڈین شہریت رکھتے ہیں جو 1995 اور سال 2002 کے درمیانی عرصے میں بیرون گئے۔

جوڑے کا ایک بیٹا اور بیٹی بہتر مستقبل کیلئے کینیڈا منتقل ہوئے جہاں قیام کے دوران انہوں نے کینیڈا کی شہریت حاصل کی۔ انہوں نے اپنے والدین کو بھی کینیڈین شہریت دلائی۔ دوسری بیٹی اور بیٹا امریکا گئے جہاں انہوں نے امریکی شہریت بھی حاصل کی۔

پولیس تفتیش کے مطابق چین سے تعلق رکھنے والے اس خاندان کے بیشتر افراد تلاش روزگار یا بہتر مستقبل کیلئے دہائی سے زائد عرصہ قبل ہندوستان منتقل ہوئے۔ خاندان کے بعض افراد قیام پاکستان سے قبل 1928 میں کراچی بھی آگئے جو صدر میں مختلف نوعیت کے کام کاج کرتے تھے۔

رچرڈ ہونو پاؤ کا خاندان مسیحی برادری سے تعلق رکھتا ہے۔ قیام پاکستان کے بعد دیگر مہاجرین کی طرح یہ خاندان بھی 1960 میں کولکتہ سے ہجرت کرکے کراچی پہنچا۔ ان کے دادا دادی اور والدین کراچی کے گورا قبرستان میں دفن ہیں۔ یہ جوڑا مقامی نجی اسپتال میں زیر علاج ہے۔

بشکریہ جنگ