ناصر حسین شاہ نے فواد چوہدری کو پی ٹی آئی کی تباہی کا ذمہ دار قرار دے دیا

سندھ کے وزیر بلدیات سید ناصر حسین شاہ نے کہا ہے کہ فواد چوہدری جیسے سیاسی فلسفی پی ٹی آئی کی تباہی کے ذمہ دار ہیں۔

انہوں نے کہا کہ فواد چوہدری کی ملک میں مزید انتظامی یونٹس بنانے کی تجویز ان کی سیاسی پسماندگی کا ثبوت ہے۔

صوبائی وزیر نے فواد چوہدری کے بیان پر رد عمل دیتے ہوئے کہا کہ انتظامی یونٹس تب بن سکتے ہیں جب اس صوبے کی اسمبلی قرار داد پاس کرے۔

ناصر حسین شاہ کا کہنا تھا کہ پی ٹی آئی ملک میں معاشی بحران پیدا کرنے کے بعد اس قسم کی باتیں کرکے انتشار پھیلانا چاہتی ہے۔

وزیر بلدیات سندھ نے کہا کہ پیپلز پارٹی کی سندھ حکومت نے کراچی کی ترقی پر نئے بجٹ میں 25 ارب روپے مختص کیے ہیں۔

انہوں نے سوال کیا کہ پی ٹی آئی نے کراچی سے نشستیں جیتنے کے بعد کتنا خرچ کیا؟

ناصر حسین شاہ نے مزید کہا کہ پی ٹی آئی نے نفرتوں کی سیاست شروع کی ہے جس کے گڑھے میں خود ہی گریں گے۔

بشکریہ جنگ