این اے 240: نامعلوم افراد نے بیلٹ باکس توڑ دیے

قومی اسمبلی کے حلقہ این اے 240 کے ضمنی انتخاب میں نامعلوم افراد نے بیلٹ باکس توڑ دیے۔

کراچی کے علاقے لانڈھی میں ہنگامہ آرائی کے باعث پولنگ کا عملہ بھاگ گیا، عملہ غائب ہونے پر نامعلوم افراد نے بیلٹ باکس توڑ دیے۔

پی ایس پی رہنما کی گاڑی پر فائرنگ کا واقعہ لانڈھی 6 میں پیش آیا ہے۔

پولیس کے اعلیٰ حکام جائے وقوعہ پر پہنچے جہاں ان کی ڈسٹرکٹ ریٹرننگ آفیسر (ڈی آر او) کے ساتھ میٹنگ ہوئی۔

این اے 240 کے ضمنی انتخاب کے دوران لانڈھی 6 نمبر میں مختلف مقامات پر فائرنگ اور ہنگامہ آرائی کے واقعات پیش آئے، جس کے دوران ایک شخص ہلاک اور پی ایس پی رہنما سمیت 5 افراد زخمی ہوگئے۔

پی ایس پی کے رہنما انیس قائم خانی کی گاڑی پر بھی فائرنگ کا واقعہ پیش آیا، تاہم وہ گاڑی میں موجود نہیں تھے۔

بشکریہ جنگ