اقبال محمد علی مرحوم کے تذکرے پر رکن قومی اسمبلی سائرہ بانو آبدیدہ ہوگئیں

گرینڈ ڈیموکریٹک الائنس (جی ڈی اے) کی رکن اسمبلی سائرہ بانو ایم کیو ایم کے سینئر رہنما اقبال محمد علی مرحوم کے تذکرے پر آبدیدہ ہوگئیں۔

قومی اسمبلی میں اظہار خیال کرتے ہوئے سائرہ بانو نے کہا کہ میرے پاس الفاظ نہیں کہ میں ان کا تذکرہ کروں۔

اسپیکر قومی اسمبلی راجا پرویز اشرف نے اظہار خیال کرتے ہوئے کہا کہ اللّٰہ سے دعا ہے اقبال محمد علی کو جنت الفردوس میں جگہ دے، اقبال محمد علی بہت ہی محبت کرنے والے اور ملنسار رہے۔

راجا پرویز اشرف نے کہا کہ پارلیمانی روایات کے مطابق اجلاس ممبر کی رحلت کے باعث بغیر ایجنڈا ملتوی کیا جاتا ہے۔

اسپیکر نے اقبال محمد علی کی رحلت کے سبب 21 اپریل 11 بجے تک اجلاس ملتوی کردیا۔

واضح رہے کہ متحدہ قومی موومنٹ (ایم کیو ایم پاکستان) کے سینئر رہنما اور رکن قومی اسمبلی اقبال محمد علی خان مختصر علالت کے بعد گزشتہ روز انتقال کرگئے تھے۔

رکن قومی اسمبلی اقبال محمد علی خان کچھ عرصہ سے عارضہ قلب میں مبتلا تھے۔ گزشتہ ماہ کراچی کے نجی اسپتال میں ہارٹ سرجری کے بعد سے وہ زیر علاج تھے۔

بشکریہ جنگ