وفاقی وزیر داخلہ رانا ثناء اللّٰہ نے کہا ہے کہ یہ تو طے ہے الیکشن میں نواز شریف مسلم لیگ (ن) کی قیادت کریں گے۔
لندن میں میڈیا سے گفتگو کرتے ہوئے رانا ثناء اللّٰہ نے کہا کہ پنجاب کے الیکشن میں ن لیگ کامیابی اور اکثریت حاصل کرے گی، نواز شریف کی قیادت میں انتخابی مہم شروع کریں گے۔
انہوں نے کہا کہ مریم نواز اگلے ہفتے پاکستان واپس جائیں گی۔
رانا ثناء اللّٰہ کا کہنا تھا کہ ووٹ اور سپورٹ نواز شریف کی ہے، ان کی واپسی ضروری ہے، نوازشریف کا بھی دل یہی ہے کہ جلد وطن واپس جائیں۔
پنجاب میں اعتماد کے ووٹ پر گفتگو کرتے ہوئے رانا ثناء اللّٰہ نے کہا کہ گورنر کی آئینی ذمہ داری تھی کہ پرویز الہٰی کو اعتماد کے ووٹ کا کہتے۔
انہوں نے کہا کہ تحریک انصاف کے 12، 13 لوگ ان سے ناراض تھے ان سے حلف لے کر اعتماد کا ووٹ لیا گیا۔ 5 افراد ناراض رہے، دیگر سے انہوں نے حلف لے کر اعتماد کا ووٹ لیا۔
وزیر داخلہ کا کہنا تھا کہ پنجاب میں ہمارے نمبرز پورے تھے اور پورے ہیں۔
انہوں نے کہا کہ کسی کی گرفتاری کا فیصلہ حکومت کا نہیں تحقیقاتی اداروں کا ہوگا۔ پاکستان تحریک انصاف (پی ٹی آئی) والوں کے کالے کرتوت سامنے آرہے ہیں۔ کیسز کی تحقیقات ہو رہی ہیں، اگر گرفتاری بنتی ہے تو ہوگی۔
رانا ثناء اللّٰہ کا کہنا تھا کہ شاہد خاقان عباسی پوری طرح کمیٹیڈ ہیں اور ن لیگ کے ساتھ ہیں۔
وفاقی وزیر داخلہ نے کہا کہ ابھی پنجاب الیکشن کا شیڈول جاری نہیں ہوا، ہوسکتا ہے 3 ماہ میں نہ ہوں۔
جب ان سے سوال کیا گیا کہ کیا مریم نواز وزیراعلیٰ پنجاب بن سکتی ہیں تو اس کے جواب میں رانا ثناء اللّٰہ نے کہا کہ ’کیوں نہیں بن سکتیں۔‘
Comments are closed.