کے پی میں انصاف لائرز فورم کو نظر انداز کیا گیا: شیر افضل مروت

پاکستان تحریکِ انصاف کے مرکزی رہنما شیر افضل مروت کا کہنا ہے کہ پنجاب کی نسبت کے پی میں انصاف لائرز فورم کو نظر انداز کیا گیا۔

یہ بات پاکستان تحریکِ انصاف کے مرکزی رہنما شیر افضل مروت نے جیو نیوز سے گفتگوکے دوران کہی ہے۔

ان کا کہنا ہے کہ ٹکٹوں سے متعلق قاضی انور کے مؤقف کی تائید کرتا ہوں، قاضی انور کے خدشات بجا ہیں، وہ آج خان صاحب سے ملیں گے۔

ترجمان تحریک انصاف نے کہا کہ چیئرمین کی منظوری سے کور کمیٹی فیصلہ سازی کر رہی ہے، قانونی ٹیم قائدین، کارکنان کے حصولِ انصاف کیلئے کوشاں ہے۔

شیر افضل مروت نے کہا کہ خان صاحب کو انصاف لائرز فورم ممبران کی قربانیوں کا پتہ ہے، امید ہے کہ خان صاحب اس کا نوٹس لے کر اس مسئلے کو حل کریں گے۔

انہوں نے کہا کہ آئی ایل ایف کے ممبران نے 9 مئی کے بعد بلا معاوضہ سینکڑوں کیسز دیکھے ہیں، آئی ایل ایف کے ممبران نے جیل بھی کاٹی ہے، ان پر پرچے بھی کاٹے گئے۔

پاکستان تحریکِ انصاف کے مرکزی رہنما نے مزید کہا ہے کہ اگر یہاں پر کیس کا فیصلہ ہوا تو سپریم کورٹ میں غیر مؤثر ہو جائے گا۔

شیرافضل مروت کا یہ بھی کہنا ہے کہ پارٹی نائب صدر ہونے کی حیثیت سے مجھے کسی سے اجازت کی ضرورت نہیں ہے۔

بشکریہ جنگ