کے پی اور پنجاب کے وزرائے اعلیٰ نے اسمبلیاں توڑنے کا اختیار عمران خان کو دے دیا، ذرائع

خیبر پختونخوا اور پنجاب کے وزرائے اعلیٰ نے صوبوں کی اسمبلیاں تحلیل کرنے کا اختیار عمران خان کو دے دیا۔

پاکستان تحریک انصاف (پی ٹی آئی) کے چیئرمین عمران خان کی زیر صدارت اجلاس ہوا، جس میں موجودہ صورت حال کا جائزہ لیا گیا۔

ایف سی اہلکار رہائش گاہ کے باہر سیکیورٹی فرائض سر انجام دیں گے۔

ذرائع کا کہنا ہے کہ اجلاس میں کے پی اور پنجاب کے وزرائے اعلیٰ ویڈیو لنک کے ذریعے شریک ہوئے، دونوں وزرائے اعلیٰ نے عمران خان کو اسمبلیاں تحلیل کرنے کا اختیار دے دیا۔

ذرائع کے مطابق کے پی اور پنجاب کے وزیر اعلیٰ نے کہا کہ آپ جب کہیں گے اسمبلیاں تحلیل کردیں گے۔

ذرائع کا کہنا ہے کہ پی ٹی آئی کے اجلاس میں بیشتر رہنماؤں نے  پنجاب اور کے پی اسمبلیاں توڑنے پر اتفاق کیا، اسمبلیاں تحلیل کرنے کا حتمی فیصلہ عمران خان کریں گے۔

پی ٹی آئی رہنماؤں نے کہا کہ لانگ مارچ سے زیادہ ضروری اسمبلیاں تحلیل کرنا ہے،  لانگ مارچ کا مقصد بھی نئے الیکشن ہیں، اگر اسمبلیاں تحلیل ہوں گی تو نئے الیکشن خود بخود ہو جائیں گے۔

بشکریہ جنگ