کراچی: ہنگامی لینڈنگ کرنے والی بھارتی پرواز کے مسافر متبادل جہاز سے دبئی روانہ

کراچی میں ہنگامی لینڈنگ کرنے والی بھارتی نجی ایئرلائن کے 138 مسافر متبادل پرواز سے دبئی روانہ ہوگئے۔

کراچی کے جناح انٹرنیشنل ایئرپورٹ پر 12 گھنٹے سے زائد وقت سے پھنسے مسافروں کو منزل تک پہنچانے کے لیے انڈین ایئرلائن اسپائس جیٹ کی پرواز ایس جی 9911 ممبئی سے شام 4:42 بجے کراچی پہنچی تھی۔

ایوی ایشن ذرائع کے مطابق بھارتی ایئرلائن اسپائس جیٹ کی دہلی سے دبئی کی پرواز نے فنی خرابی کے باعث منگل کی صبح سوا 9 بجے کراچی ایئرپورٹ پر ہنگامی لینڈنگ کی۔

پاکستان کی قومی ایئر لائنز کے انجینئرز نے فنی خرابی کے شکار بوئنگ 737 میکس 8 طیارے کے معائنے کے بعد اسے اڑان کے لیے ان فٹ قرار دیا تھا۔

ذرائع کا کہنا ہے کہ انڈین ایئرلائن اسپائس جیٹ کی پرواز ایس جی 9911 ممبئی سے کراچی پہنچی۔

جہاز کے معائنے کے بعد کئی گھنٹے سے زائد وقت سے جہاز میں موجود 138 مسافروں کو جناح انٹرنیشنل ایئرپورٹ کے لاؤنج میں منتقل کر دیا گیا تھا۔

تمام مسافروں کی روایتی انداز میں مہمان نوازی کی گئی، سول ایوی ایشن کی جانب سے مسافروں کو کھانا اور سہولتوں کا دیگر سامان فراہم کیا گیا۔

فنی خرابی کی شکار پرواز کے مسافروں کو ان کی منزل دبئی تک پہنچانے کے لیے اسپائس جیٹ نے جہاز متبادل پرواز ایس جی 9911 کے طور پر ممبئی سے کراچی بھیجا۔

ترجمان ایوی ایشن کے مطابق بھارتی پرواز کے 138 مسافر متبادل پرواز کے ذریعے کراچی سے دبئی کے لیے رات 9:15 بجے روانہ ہوگئے۔

بشکریہ جنگ