کراچی: ڈینٹل کلینک پر حملے کا ٹارگٹ ذوالفقار خاصخیلی نے دیا، گرفتار ملزم کے انکشافات
کراچی کے علاقے صدر میں ’ہو ڈینٹل کلینک‘ پر حملہ کرکے رونالڈو رائیونڈ چاؤ کے قتل اور ڈاکٹر رچرڈ ہونو پاؤ اور ان کی اہلیہ فن نائن پاؤ کو زخمی کرنے کے مقدمے میں کاؤنٹر ٹیررزم ڈپارٹمنٹ (سی ٹی ڈی) کے ہاتھوں گرفتار ملزم وقار خشک نے سنسنی خیز انکشافات کیے ہیں۔
سی ٹی ڈی حکام کی جاری کردہ پریس رپورٹ کے مطابق سی ٹی ڈی نے خفیہ اداروں کی مدد سے دہشتگرد کے فٹ پرنٹ کا بخوبی جائزہ لیتے ہوئے اس کا تعاقب جاری رکھا اور اسے ملیر کے علاقے سے گرفتار کیا۔
واردات کے بعد فرار ہونے کے بعد ملزم کے ٹھکانے تک کے راستے کی لگ بھگ 100 سی سی ٹی وی فوٹیجز کی مدد سے ملزم تک پہنچا گیا۔
پولیس تفتیش کے مطابق ملزم کا تعلق دہشتگرد تنظیم ایس آر اے اور اس کے ذیلی گروپ سندھ پیپلز آرمی (ایس پی اے) سے ہے۔
ملزم سے کی گئی تفتیش کے مطابق ملزم اصغر علی شاہ عرف سائیں اور ذوالفقار خاصخیلی عرف سفیر سے رابطے میں تھا۔
ملزم کے مطابق صدر میں غیر ملکیوں کے ڈینٹل کلینک پر حملے کا ٹارگٹ اسے ذوالفقار خاصخیلی نے دیا تھا۔
پولیس نے اس حملے اور ان کے فرار کی سی سی ٹی وی فوٹیج کی مدد سے تیار تصاویر میں سامنے آنے والی اشیاء بھی برآمد کی ہیں۔
گرفتار ملزم نے گلابی رنگ کا جو بیگ پہنا ہوا تھا وہ بھی برآمد کرلیا گیا ہے جبکہ واردات میں استعمال ملزم کی موٹر سائیکل بھی برآمد کرلی گئی ہے۔
حکام کے مطابق گرفتار ملزم کے دیگر ساتھیوں کی گرفتاری کے لیے کوششیں جاری ہیں۔
Comments are closed.