کراچی: پولیس مقابلوں میں ایک اسٹریٹ کرمنل ہلاک، دوسرا زخمی حالت میں گرفتار

کراچی کے علاقے گلشن اقبال میں دو مبینہ پولیس مقابلوں میں ایک اسٹریٹ کرمنل ہلاک جبکہ دوسرے کو زخمی حالت میں گرفتار کرلیا گیا۔

گلشن اقبال ڈسکو بیکری کے قریب اسپیشل انوسٹی گیشن اور اینٹی وہیکل لفٹنگ پولیس نے مشترکہ کارروائی کی۔ اس دوران دوطرفہ فائرنگ کے تبادلے میں ایک ملزم علی رضا مارا گیا، جبکہ گولی لگنے سے رکشہ ڈرائیور زخمی ہوا۔

ملزمان اپنی گاڑی چھوڑ کر دوسری گاڑی چھین کر فرار ہوگئے، ملزمان کی گاڑی سے اسلحہ بھی برآمد ہوا۔

دوسری جانب عزیز بھٹی پولیس نے گلشن اقبال بلاک 13 ڈی سے مبینہ مقابلے کے بعد ایک ملزم شاہ رخ کو زخمی حالت میں گرفتار کر کے اسلحہ، موبائل فونز، نقدی اور چھینی ہوئی موٹر سائیکل برآمد کرلی، جبکہ ملزم کے دو ساتھی فرار ہوگئے۔

بشکریہ جنگ