کراچی: صدر بازار میں گٹروں کی صفائی، سڑک پر گندگی کا ڈھیر لگادیا

کراچی کے مصروف ترین کاروباری علاقے صدر میں عبداللّٰہ ہارون روڈ پر واٹر اینڈ سیوریج بورڈ کے عملے نے گٹروں کی صفائی کرکے ان سے نکلنے والی گندگی اور کچرے کا مرکزی بازار کی شاہراہ پر ڈھیر لگادیا۔

اس سے علاقے میں نہ صرف تعفن پھیل گیا ہے بلکہ یہ کچرا ٹریفک کی آمد و رفت میں بھی خلل کا سبب بن رہا ہے، گاڑیاں کچرے پر سے گزر رہی ہیں جس سے علاقے میں مزید گندگی پھیل رہی ہے۔

واٹر اینڈ سیوریج بورڈ کے علاقہ ذمہ دار ندیم نے ٹریفک پولیس کے رابطہ کرنے پر بتایا کہ گٹروں سے کچرا نکال کر سڑک پر ڈالنے تک کا کام ان کی ذمہ داری ہے جبکہ کچرا اٹھانے کا کام کراچی میونسپل کارپوریشن کے متعلقہ شعبے کے ذمے آتا ہے۔

جب ان سے پوچھا گیا کہ متعلقہ شعبہ کے کوآرڈینیشن کے بغیر یہ کام کیسے کردیا گیا تو ان کا کہنا تھا کہ ان کے لوگ ایسا ہی کرتے ہیں۔

صدر کے مرکزی بازار میں صورتحال کی جانب توجہ مبذول کرانے پر مذکورہ اہلکار کا کہنا ہے کہ وہ اپنی ذاتی کوشش سے متعلقہ شعبے کے لوگوں سے رابطہ کر کے کچرا اٹھوانے کی کوشش کریں گے۔

علاقے میں ٹریفک پولیس کے انچارج نواز سیال نے اس صورتحال کی ویڈیو سوشل میڈیا پر شیئر کی ہے۔

انہوں نے بتایا کہ کے ایم سی کی جانب سے سڑکوں پر رکھے گئے کچرا دان بھی ٹریفک میں رکاوٹ کا سبب بنتے ہیں جنہیں وہ ٹریفک کلیئر کرانے کے لیے ہٹاتے ہیں۔

سیوریج کا پانی سڑک پر آجائے تو وہ بھی ٹریفک پولیس ہی صاف کرواتی ہے اور اب یہ کچرا بھی ٹریفک پولیس کے لیے وبال جان بن گیا ہے کیونکہ اس کی وجہ سے علاقے میں ٹریفک جام ہو رہا ہے۔

بشکریہ جنگ