کراچی: سستا سرکاری آٹا بیچنے والوں پر فائرنگ، 2 افراد زخمی

کراچی کے علاقے ملیر میں نیشنل ہائی وے پر سرکاری نرخوں پر سستا آٹا بیچنے والے 2 افراد ڈکیتی کے دوران مزاحمت پر ڈاکوؤں کی فائرنگ سے زخمی ہو گئے۔

شاہ لطیف ٹاؤن پولیس کے مطابق واقعہ بھینس کالونی موڑ کے قریب پیش آیا۔

پولیس کا کہنا ہے کہ موٹر سائیکل سوار مسلح ملزمان نے آٹا بیچنے والوں سے مبینہ طور پر لوٹ مار کی اور مزاحمت کرنے پر فائرنگ کر دی۔

ملزمان کی فائرنگ سے 2 افراد 30 سالہ دین محمد ولد میر علی اور 30 سالہ حسنین ولد پاک علی زخمی ہو گئے جبکہ ملزمان باآسانی فرار ہو گئے۔

زخمیوں کو فوری طور پر ایدھی ایمبولینس کے ذریعے جناح اسپتال منتقل کر دیا گیا ہے جہاں انہیں طبی امداد دی جا رہی ہے۔

بشکریہ جنگ