کراچی: بجلی کی بندش کےخلاف بلوچ کالونی پل پر احتجاج

کراچی کے علاقے عمر کالونی، بلوچ پاڑا کے رہائشیوں نے بجلی کی بندش کےخلاف بلوچ کالونی پل پر احتجاج کیا۔

دھرنے کے باعث شہید ملت ایکسپریس وے پر دونوں طرف سے ٹریفک بند ہوگئی اور قیوم آباد سے شارع فیصل اور بہادرآباد سے بلوچ کالونی جانے والا ٹریفک معطل ہوگیا۔

ٹریفک پولیس کے مطابق راستوں کی بندش کے باعث شارع فیصل آنے اور جانے والا ٹریفک بھی متاثر ہوا، قیوم آباد سےٹریفک کو ڈیفنس کالا پل یا کورنگی کازوے کی طرف موڑا جارہا ہے، جبکہ شہید ملت روڈ سے ٹریفک کو شارع فیصل کی طرف بھیجا گیا۔

کےالیکٹرک ذرائع کے مطابق واجبات کی عدم ادائیگی پر علاقے کی پی ایم ٹی سے بجلی منقطع ہے۔

ذرائع کا مزید کہنا ہے کہ شہری بل جمع کرادیں تو بجلی کی بلاتعطل فراہمی کی جائے گی۔

بشکریہ جنگ