کراچی: آج دوپہر تھنڈر سیلز بننے سے تیز بارش کا امکان

ملک اور صوبۂ سندھ کے سب سے بڑے شہر کراچی میں رات گئے تیز ہواؤں اور گرج چمک کے ساتھ دیر تک بارش ہوئی۔

ڈائریکٹر محکمۂ موسمیات سردار سرفراز کا کہنا ہے کہ کراچی میں آج بھی گرج چمک کے ساتھ بارش کا امکان ہے۔

کراچی کے ضلع غربی کے علاقے اورنگی ٹاؤن میں ایک گھر کی چھت گرنے سے ملبے تلے دب کر خاتون اور 3 بچے جاں بحق ہو گئے۔

انہوں نے بتایا ہے کہ آج دوپہر میں شہر میں تھنڈر سیلز بننے کا سلسلہ شروع ہو سکتا ہے، جس کے باعث کہیں کہیں تیز بارش بھی ہو سکتی ہے۔

ڈائریکٹر محکمۂ موسمیات کا کہنا ہے کہ پورا سندھ مون سون ہواؤں کی گرفت میں ہے، مون سون سسٹم نے خصوصاً جنوبی سندھ کو اپنی لپیٹ میں لیا ہوا ہے، جہاں اس سسٹم کا پھیلاؤ کراچی تک پہنچ رہا ہے۔

کراچی میں رات گئے ڈیڑھ گھنٹے تک ہونے والی موسلا دھار بارش کے بعد کراچی کی زیادہ تر سڑکوں پر جمع پانی اتر گیا۔

انہوں نے بتایا کہ آئندہ 2 روز (11 ستمبر) تک شہرِ قائد میں بارش کا امکان ہے، دو، تین روز پہلے گزشتہ رات بارش ہونے کی پیش گوئی کی گئی تھی۔

ڈائریکٹر محکمۂ موسمیات سردار سرفراز کا مزید کہنا ہے کہ 15 اور 16 ستمبر کے بعد بارش کا ایک اور اسپیل متوقع ہے۔

کراچی میں رات گئے تیز ہواؤں اور گرج چمک کے ساتھ بارش ہوئی ہے جس کے دوران کرنٹ لگنے سے ایک شخص جاں بحق ہو گیا۔

انہوں نے یہ بھی کہا کہ کراچی اور حیدر آباد میں آدھے گھنٹے میں 50 سے 60 ملی میٹر بارش ہو جائے تو افرا تفری مچ جاتی ہے۔

محکمۂ موسمیات کے مطابق کراچی کا کم سے کم درجۂ حرارت 27 ڈگری سینٹی گریڈ ریکارڈ کیا گیا جبکہ زیادہ سے زیادہ درجۂ حرارت 34 ڈگری سینٹی گریڈ رہنے کا امکان ہے۔

بارش کا سلسلہ آج دن بھر اور کل بھی جاری رہنے کی پیش گوئی کی گئی ہے

محکمۂ موسمیات نے یہ بھی بتایا ہے کہ شہرِ قائد میں مغرب کی سمت سے چلنے والی ہواؤں کی رفتار 12 کلو میٹر فی گھنٹہ ہے، جن میں نمی کا تناسب 78 فیصد ہے۔

بشکریہ جنگ