ڈپریشن کراچی سے 280 کلو میٹر دور موجود

محکمۂ موسمیات کا کہنا ہے کہ ڈپریشن کراچی سے 280 سے 300 کلو میٹر جنوب مشرق میں موجود ہے، یہ ڈپریشن 24 گھنٹوں کے دوران سائیکلون بن سکتا ہے۔

محکمۂ موسمیات کے مطابق سائیکلون بننے کی صورت میں 70 سے 90 کلو میٹر فی گھنٹہ کی رفتار سے ہوائیں چل سکتی ہیں۔

سندھ کے شہر ٹھٹھہ میں کیٹی بندر سمیت ساحلی پٹی میں موسم تبدیل ہو گیا، طوفانی ہوائیں چلنے لگیں اور بارش شروع ہو گئی۔

محکمۂ موسمیات کا کہنا ہے کہ ڈوپلر ریڈار کے 450 کلو میٹر کے دائرے میں ڈپریشن کے سیلز نظر آ رہے ہیں، ریڈار سے ڈپریشن کی ٹریکنگ میں آسانی ہو رہی ہے۔

محکمۂ موسمیات نے یہ بھی بتایا کہ ڈپریشن شمال مغرب کی جانب بڑھا تو بلوچستان میں اورماڑہ اور پسنی کو ہٹ کر سکتا ہے، یہ ڈپریشن زیادہ مغرب کی جانب بڑھا تو اومان اور جنوبی ایران کو متاثر کر سکتا ہے۔

شمال مشرقی بحیرۂ عرب میں تشکیل پانے والے ٹراپیکل سمندری طوفان شاہین کے حوالے سے پاکستانی محکمۂ موسمیات نے بھی الرٹ جاری کر دیا۔

ڈائریکٹر محکمۂ موسمیات سردار سرفراز کا کہنا ہے کہ آج شام ممکنہ طور پر ڈپریشن مزید شدت اختیار کر سکتا ہے، جس کے باعث کل صبح سائیکلون بننے کا امکان ہے۔

انہوں نے یہ بھی بتایا کہ اس سائیکلون کا پھیلاؤ کراچی سے 100 سے ڈیڑھ سو کلو میٹر دور ہو سکتا ہے، جس کے باعث ساحلی علاقوں میں تیز ہواؤں کے ساتھ موسلا دھار بارش کا امکان ہے۔

بشکریہ جنگ