چیف الیکشن کمشنر کی سیکریٹری کو فوری لاہور پہنچنے کی ہدایت

چیف الیکشن کمشنر سکندر سلطان راجہ نے قومی اسمبلی کے حلقے این اے 75 ڈسکہ میں دوبارہ الیکشن کرانے کے حوالے سے سپریم کورٹ کا فیصلہ آنے کے بعد سیکریٹری الیکشن کمیشن کو فوری لاہور پہنچنے کی ہدایت کی ہے۔

چیف الیکشن کمشنر سکندر سلطان راجہ نے سیکریٹری الیکشن کمیشن کو قومی اسمبلی کے حلقے این اے 75 ڈسکہ کے الیکشن کے لیے انتظامات کو حتمی شکل دینے کی ہدایت کر دی۔

سپریم کورٹ آف پاکستان نے قومی اسمبلی کے حلقہ این اے 75 ڈسکہ میں دوبارہ انتخابات سے متعلق کیس کا مختصر فیصلہ سناتے ہوئے پی ٹی آئی کی اپیل مسترد کر دی جبکہ الیکشن کمیشن کا اس حلقے میں دوبارہ الیکشن کرانے کا حکم برقرار رکھا ہے۔

انہوں نے حکم دیا ہے کہ الیکشن کمیشن پنجاب کا دفتر و سیکریٹریٹ کے متعلقہ ونگز بھی ہفتے اور اتوار کو کھلے رکھے جائیں۔

چیف الیکشن کمشنر سکندر سلطان راجہ نے کہا ہے کہ تمام اسٹیک ہولڈرز کے ساتھ مشاورت کریں، این اے 75 میں ضمنی انتخاب صاف، شفاف اور غیر جانبدارانہ ہونا یقینی بنایا جائے۔

چیف الیکشن کمشنر سکندر سلطان راجہ کا یہ بھی کہنا ہے کہ ضمنی الیکشن کے دوران جو کوتاہیاں ہوئیں امید ہے کہ وہ دوبارہ نہ ہوں۔

واضح رہے کہ آج سپریم کورٹ آف پاکستان نے قومی اسمبلی کے حلقہ این اے 75 ڈسکہ میں دوبارہ انتخابات سے متعلق کیس کا مختصر فیصلہ سناتے ہوئے پی ٹی آئی کی اپیل مسترد کر دی جبکہ الیکشن کمیشن کا اس حلقے میں دوبارہ الیکشن کرانے کا حکم برقرار رکھا ہے۔

بشکریہ جنگ