پی ٹی آئی کے لانگ مارچ کا وزیر آباد سے دوبارہ آغاز

پاکستان تحریک انصاف نے لانگ مارچ کا وزیر آباد سے دوبارہ آغاز کردیا، قاتلانہ حملے میں زخمی عمران خان نے وڈيو لنک پر لانگ مارچ کے شرکا سے خطاب کیا۔

اپنے خطاب میں عمران خان کا کہنا تھا کہ انہيں منصوبہ بندی کے تحت قتل کرنے کی کوشش کی گئی، یہ منصوبہ بندی ستمبر میں ہوئی تھی۔

عمران خان نے کہا کہ آرمی چیف کی تقرری نواز شریف اور زرداری کا مسئلہ ہوگا، میرا نہیں، میں نے کبھی نہیں سوچا کہ نیا آرمی چیف کون ہوگا، یہ فیصلہ میرٹ پر ہونا چاہیے۔

انہوں نے کہا کہ لانگ مارچ کو لے کر چل رہے ہیں، کنٹینر کے فارنزک سے ثابت ہوا کہ دو مختلف قسم کی گولیاں لگی ہیں۔

عمران خان کا کہنا تھا کہ حقیقی آزادی کی تحریک رُکے گی نہيں بلکہ اور زور پکڑے گی۔

انہوں نے مزید کہا کہ نواز شریف ہمیشہ اپنے امپائر کے ساتھ کھیلتے ہیں، امپائر کی مجھے نہیں بلکہ نواز شریف کو ضرورت ہے۔

بشکریہ جنگ