پہلا ون ڈے: نیوزی لینڈ کا پاکستان کو جیت کیلئے 256 رنز کا ہدف

نیوزی لینڈ نے پہلے ون ڈے میچ میں پاکستان کو جیت کے لیے 256 رنز کا ہدف دے دیا جس کے تعاقب میں پاکستان کی بیٹنگ جاری ہے۔ 

نیشنل بینک کرکٹ ایرینا (نیشنل اسٹیڈیم) کراچی میں کھیلے جارہے میچ میں نیوزی لینڈ کی ٹیم مقررہ 50 اوورز میں 9 وکٹوں کے نقصان پر 255 رنز بناسکی۔ 

قومی ٹیم کے کپتان بابر اعظم نے ٹاس جیت کر پہلے بولنگ کرنے کا فیصلہ کیا۔ 

نسیم شاہ نے پہلے ہی اوور میں قومی ٹیم کو کامیابی دلوائی جب ڈیون کونوے بغیر کوئی رن بنائے بولڈ ہوئے۔ 

اس کے بعد دوسری وکٹ پر کین ولیمسن اور فن ایلن نے 36 رنز جوڑے، لیکن یہاں قومی ٹیم کو محمد وسیم نے کامیابی دلوائی جب انہوں نے 29 رنز بنانے والے فن ایلن کو آؤٹ کیا۔ 

نیوزی لینڈ کی تیسری وکٹ 69 رنز پر گری جب ڈیبیو کرنے والے اسامہ میر نے کین ولیمسن کو بولڈ کیا۔ انہوں نے 26 رنز بنائے تھے۔ 

نیوزی لینڈ کی وقفے وقفے سے وکٹیں تو گرتی رہیں، لیکن رنز بنانے کا سلسلہ بھی چلتا رہا۔ 

مہمان ٹیم کی چوتھی وکٹ 125 رنز پر گری تھی، جہاں محمد نواز نے ڈیرل مچل کو آؤٹ کیا۔ انہوں نے 36 رنز کی اننگز کھیلی۔

پانچویں وکٹ 147 کے مجموعے پر گری جب ٹام لیتھم 42 رنز بنا کر اسامہ میر کی گیند پر آؤٹ ہوئے۔ 

چھٹے آؤٹ ہونے والے بیٹر گلین فلپس تھے جو 37 رنز بنانے کے بعد آؤٹ ہوئے۔ 

پاکستان کے خلاف نیوزی لینڈ ساتویں اور آٹھویں وکٹ 220 کے مجموعے پر گری جب نسیم شاہ نے بالترتیب 43 رنز بنانے والے مائیکل بریسویل اور پھر صفر پر مائیکل شپلے کو کلین بولڈ کیا۔

نسیم شاہ نے نیوزی لینڈ کی 9ویں وکٹ لے کر میچ میں اپنی پانچ وکٹیں مکمل کیں۔ انہوں نے اننگز کے آخری اوور میں مچل سینٹنر کو کیچ آؤٹ کیا۔ سینٹنر نے 21 رنز بنائے۔

میچ سے قبل میڈیا سے گفتگو کرتے ہوئے قومی ٹیم کے کپتان بابر اعظم کا کہنا ہے کہ پاکستان کی ٹیم میں اسامہ میر کو شامل کیا گیا ہے۔

نیوزی لینڈ کے کپتان کین ولیمسن نے کہا کہ ٹیم میں ایک تبدیلی کی گئی ہے، ہنری شپلے ون ڈے میں ڈیبیو کر رہے ہیں۔

لیگ اسپنر اسامہ میر نیوزی لینڈ کے خلاف ون ڈے میں ڈیبیو کر رہے ہیں۔

کوچ ثقلین مشتاق نے اسامہ میر کو ون ڈے کیپ پہنائی۔

پاکستان ٹیم میں امام الحق، فخر زمان، بابر اعظم (کپتان)، محمد رضوان، حارث سہیل اور سلمان علی آغا شامل ہیں۔

ان کے علاوہ محمد وسیم، نسیم شاہ، حارث رؤف، محمد نواز اور اسامہ میر بھی ٹیم کا حصہ ہیں۔

نیوزی لینڈ ٹیم میں ڈیون کونوے، فن ایلن، کین ولیمسن (کپتان)، ڈیرل مچل، ٹام بلنڈل، گلین فلپس مائیکل بریسویل، مچل سیٹنر، ہنری شپلے، ٹم ساؤتھی اور فرگوسن شامل ہیں۔

بشکریہ جنگ