پنجاب:پرائیوٹ اسکولز کا پیر کی چھٹی پر اعتراض

لاہور سمیت پنجاب میں 3 دن سرکاری اور پرائیوٹ اسکولز بند رکھنے کے حوالے سے محکمہ تعلیم اور محکمہ ہائیر ایجوکیشن کوئی نوٹیفیکیشن جاری نہ کر سکا، پرائیوٹ اسکولز کی تنظیموں نے پیر کی چھٹی پر اعتراض اٹھا دیا۔

ریلیف کمشنر پنجاب نے فضائی آلودگی کو روکنے کے لیے تعلیمی اداروں میں ہفتہ وار 3 چھٹیاں دینے کا نوٹیفیکیشن جاری کیا تھا مگر محکمہ تعلیم اور محکمہ ہائیر ایجوکیشن اس سلسلے میں تاحال کوئی نوٹیفیکیشن جاری نہ کر سکے۔

لاہور سمیت پنجاب کے متعدد شہر مسلسل اسموگ کی لپیٹ میں ہیں، فضائی آلودگی کی وجہ سے شہری پریشان ہیں۔

تین دن کی چھٹی سے متعلق ریلیف کمشنر پنجاب کے نوٹیفیکیشن کے تحت ہفتہ ،اتوار کے ساتھ پیر کے روز بھی سرکاری ،پرائیوٹ تعلیمی ادارے اسکولز کالجز اور اکیڈمیز نہیں کھولے جائیں گےجبکہ نوٹیفیکیشن پر 27 نومبر سے عمل درآمد کروانے کا حکم بھی جاری کیا گیا ۔

دوسری جانب صورتحال اس کے برعکس ہے ، محکمہ تعلیم اور محکمہ ہائیر ایجوکیشن کی جانب سے تاحال ہفتہ وار 3چھٹیوں کا کوئی نوٹیفیکیشن جاری نہیں ہوا۔

پرائیوٹ اسکولز مالکان نے 3 چھٹیوں کے نوٹیفیکیشن پر اعتراض اٹھا دیااور کہاکہ ایک اضافی چھٹی طالب علموں کے ساتھ زیادتی ہے، طالب علم پہلے ہی تعلیمی لحاظ سے کمزور ہیں۔

بشکریہ جنگ