پاک فوج اور فرنٹیئر کور کے ساتھ اظہار یکجہتی کیلئے پشاور میں ریلیاں

پاک فوج اور فرنٹیئر کور کے ساتھ اظہار یکجہتی کیلئے پشاور اور ضلع خیبر سے تعلق رکھنے والے سابق سیاسی قائدین کی قیادت میں قلعہ بالاحصار تک ریلیاں نکالی گئیں۔

شرکاء کے مطابق ریلیوں کا مقصد پاک فوج اور فرنٹیئر کور کے ساتھ غیر متزلزل یکجہتی کا اظہار کرنا تھا، جس میں سابق اور موجودہ عہدیداروں، مقامی رہنماؤں، علاقہ مکینوں اور نوجوانوں کی بڑی تعداد نے شرکت کی۔ 

ریلیوں کے شرکاء نے پاک فوج اور فرنٹیئر کور کے حق میں پُرجوش نعرے لگائے اور بہادر سپاہیوں کی بھرپور تعریف کی۔

ریلی کے شرکاء فوج اور فرنٹیئر کور کے حامی پیغامات سے مزین پلے کارڈز اٹھائے ہوئے تھے، مظاہرین نے فرنٹیئر کور نارتھ کے سپاہیوں کی جانب سے ثابت قدمی اور صبر کا مظاہرہ کرنے پر جذباتی انداز میں اظہار تشکر کیا اور انکی تعریف کی۔ 

متحد آواز میں ریلیوں کے شرکاء نے 9 مئی کو ہونے والے دفاعی اداروں کی عمارتوں پر حملوں کی شدید مذمت کی۔

انہوں نے حکومت پر زور دیا کہ وہ ان جارحانہ کارروائیوں کے ذمہ دار افراد کے خلاف فیصلہ کن کارروائی کرے اور انہیں سخت سزا دے۔

ریلیوں کے دوران مقررین نے پاک فوج اور دیگر قانون نافذ کرنے والے اداروں کے ساتھ کندھے سے کندھا ملا کر کھڑے ہونے کے اپنے غیر متزلزل عزم کا اعادہ کیا۔

انہوں نے قبائلی اضلاع میں قیام امن کے لیے پاک فوج اور فرنٹیئر کور کی جانب سے دی گئی قربانیوں کا اعتراف کیا۔

ریلیوں کے شرکاء نے پاک فوج اور فرنٹیئر کور کو قبائلی عوام کےلیے بےپناہ فخر اور پہچان کا ذریعہ قرار دیا۔

اس ریلی نے قبائلی عوام اور قوم کے بہادر محافظوں کے درمیان پائیدار بندھن کے ایک مضبوط ثبوت کے طور پر کام کیا۔

بشکریہ جنگ